منى زكي توضح أسباب تحمسها للعمل في "تحت الوصاية"
أكدت الفنانة منى زكي؛ أنها تحمست لشخصية حنان في مسلسل تحت الوصاية موضحة أنها تتمنى تغيير القوانين التي تقف أحيانا ضد المرأة.
وقالت زكي في مداخلة هاتفية مع برنامج "كلمة أخيرة" المذاع على قناة "أون": "اللي اختار الموضوع اللي فكر فيه هما شيرين وخالد؛ شيرين القصة عارفاها كويس أوي وهي أكتر حد تعرف تكلم عن الفكرة وأنا تحمست لحاجة إنسانية تمسنا كسيدات؛ المسلسل بيتكلم عن حدوته ازاي احنا في وظايف معينة مبنتقبلش الست ونقفل عليه".
وأضافت: "محتاجين نتكلم قد أيه في ستات أقويا وعايزين يعملوا أحسن ما عندهم عشان ولادهم وصعب أوي تقللي من جهدهم".
وتابعت: "شخصية حنان في المسلسل كانت ست بيت ومعندهاش خبرة؛ أنا مش بفهم في القوانين أنا ممثلة وبتكلم ايه اللي جذبني في حنان وأني أشتغل مع مخرج كبير زي محمد شاكر واشتغل مع ممثلين غاية في الموهبة ومفكرين في كل التفاصيل واللي قدام وورا الكاميرا كلهم محترفين".
وأوضحت: "أدين بالفضل للأستاذ شاكر مخرج العمل لأنه حاول أنه يقربني من الشخصية وأنا كنت جاية من ضغط شغل تاني والأستاذ محمد شاكر خضير هو أكتر حد ساعدني وكان في توفيق من ربنا قبل كل شيء".
وعن الهجوم على المسلسل قبل عرضه قالت زكي: "أنا بحاول متأثرش بالجزء السلبي عالم السوشيال ميديا مش حقيقي لا بسقوطه ولا هجومه ولا نجاحه أنا بحس أنه لو في حاجة صغيرة ممكن تكبر أو لو حاجة كبيرة ممن تصغر وتتلاشي".
وواصلت: "مبتبقاش حاجة طبيعية أوقات كتير بتكون حاجة مفتعلة وأحيانا ناس بيكون عندها غضب معين وبتحاول تصبه على شيء تاني أنا بعمل وظيفتي بس بشكل يرضيني ومستمتعة بيه وبكون ماشية على رؤية الناس اللي بشتغل معاها لأن دة عمل جماعي".
وذكرت" "ربنا في الأخر هو اللي بينجح أو بيخلي حاجة في الذاكرة أو متبقاش أو متفرقعش خالص ودي كلها حاجات محدش عارفها يعني".
واختتمت: "نفسي يتغير قوانين كتير في صالح الأم هي أكتر حد عايز مصلحة ولادها دا الأكيد ومش عايزة تحرم ولادها من حاجة وبتحاول لما بتتحط في الصعب تكون واعية وتعمل الصح والأم أكتر واحدة عارفة مصلحة ولادها".
