عفاف شعيب تعلق على قرار صابرين التمثيل بالباروكة

أكدت الفنانة عفاف شعيب؛ أن والدها كان يرفض فكرة العمل بالفن على الإطلاق موضحة أنه وافق على التحاقها بمعهد الفنون المسرحية لأنها أخبرته إنها سوف تعمل كمذيعة.

وقالت شعيب في مقابلة مع برنامج "العرافة" المذاع على قناة "النهار": "أنا والدي كان رافض تماما؛ وأما ولدتي لما لقتني شغوفة وحابة الفن؛ أنا بحب مجال التمثيل من وانا طفلة وأنا مع السينما النظيفة وهي اللي مفيهاش قبلات ولا أحضان".

وأضافت: "مش شرط أن السينما النظيفة تكون بالحجاب؛ مش ممكن أعمل دور من غير الحجاب؛ استحالة أقلع الحجاب ومينفعش ألبس باروكة مش حلوة فيها ومش مقتنعة أنها تكون غطاء للرأس".

وعن قرار الفنانة صابرين بالتمثيل باستخدام باروكة قالت شعيب: "الدين لا يتجزأ؛ وهي سألتني وكلمتني وقلتلها الفتوى في وزر الشيخ اللي قالك؛ هي قالتلي في شغل والمخرج عايزني أطلع ببروكة أو بشعري وأنا قلتلها أنا مقدرش أفيدك أسألي حد من أهل العلم أسالي حد متخصص في الدين لأن أنا ممكن أقولها كلمة أضيع فيها مع ربنا طيب ليه".

وأوضحت: "سألت شيخ قالها وماله اطلعي يا بنتي حطي الباروكة؛ أنا عارفة الشيخ ولكن مقدرش أقول؛ هو شيخ بيطلع فتاوي كتير كدة".

وواصلت: "أنا مش بضايق لما أشوف نفسي من غير الحجاب زمان؛ لأن دا مجهودي ومينفعش أشيله؛ أنا حابة شكلي اللي أنا فيه واللي كان زمان تاريخ في حياتي والحمد لله شيء مشرف مفيش غلطة؛ ومشتغلتش في السينما لأن كان في أدوار مينفعش أعملها".

وكشفت شعيب عن دخولها في خلاف مع احدى الممثلات خلال مهرجان الدراما؛ موضحة أن الممثلة حاولت أن تغير جلوس الفنانة فادية عبد الغني.

وأكملت: "فادية عبد الغني فنانة كبيرة وليها اسم وتاريخ فعيب لما تيجي واحدة ممثلة؛ جات تقومها من جنبي وفادية قالتلها لو قمت هخرج برة وهي قالتلها اقعدي ورا؛ اتكلمنا وحلينا المشكلة وقعدت جنبي".

واختتمت: "الفنان خالد زكي كلمني وقالي كلهم اتكرموا واحنا لا؛ قلتله معلش يا خالد يكفي أن احنا أرضيتنا عن الجمهور كبيرة أوي ودا يكفيني".