محمد محيي: لا أمانع إنتاج المهرجانات.. وأغاني منير أقل من زمان
أكد الفنان محمد محيي؛ أنه لا يمانع إنتاج أغاني مهرجانات وراب، مشيرا إلى أنه يستمع إلى الجميع وأنه غير موقفه من هؤلاء المطربين مؤخرا.
وقال محيي في مقابلة مع برنامج "حبر سري" المذاع على قناة "القاهرة والناس": "لو فكرت أنتج هحاول أعمل أفكار جديدة ويكون فيها تواصل أجيال وهحاول أجمع بين شكل الاغنية الطبيعي مع الراب الجديد؛ هنتج أفكار محدش يعملها غيري يعني".
وأضاف: "أنا بحب الأغاني الشعبي؛ وأغاني المهرجانات مع الوقت بقيت أحب التركيبة بتاعتهم لأنه ابتدأ يبقي فيه غنا؛ كنت الأول رافضهم؛ أحنا زمان كنا بنعمل كل حاجة في الاغنية ولكن دلوقت الزمن اتغير طبعا؛ وأنا هحاول أني أنتج على التغيير دة".
وتابع: "أنا لو هنتج ممكن أنتج لمسلم أنا بحب صوته وعنده حاجات جميلة وجرئية خالص؛ أنا بسمع كل الناس وبحب أغنية البخت لويجز؛ والحلو فيها أنه خرج برة القالب بتاعه رغم أن القالب بتاعه يعتبر في وسط الراب؛ في ناس كتيرة بحبهم في أشكال الراب؛ وأنا حاليا بنتج حاجة بعمل أغنية بيني وبين مطرب راب مفاجأة؛ الاغنية هتكون مع جوكر".
وعن الخلاف السابق بين المنتج نصر محروس والمطرب بهاء سلطان قال محيي: "أنا محضرتش بردو أوي بدايات المشاكل؛ أنا كنت موجود في وقت الأمور كانت ماشية أو فيها المشاكل الطبيعية بتاعة الشغل؛ أنا بشوف أن نصر الكبير وأنه كان ممكن يستفيد ببهاء بفترات أكبر من كدة".
وأوضح: "نصر أكبر كان ممكن يحتوي بهاء وفي وقت معين شيرين لأنهم ابتداوا معاه ونجحوا معاه والانسب أنهم كانوا يكملوا معاه".
وواصل: "احنا اتربينا على أغاني محمد منير وأنا بحب صوت منير لأنه شديد التميز ومن وانا طفل أفتكر أن جابتني اغنية بنتولد وأغنية شبابيك وأغنية تعالي نلضم أسامينا؛ حاليا أنا بشوف أن أغاني منير مش بقوة أوقات كتيرة؛ الوقت اتغير فبقت حاجات تانية ولكن أنا بحب منير زمان أكتر".
واختتم: "أنا مشفتش أعلان محمد منير ولكن أنا بشوف أنه قيمة كبيرة وأنا بحبه ومهما كان انتقادنا ميقللش من قيمة منير وممكن انتقاد الناس دة من حبهم فيه".
