وفاء عامر تتحدث عن دور "شلباية" في "حضرة العمدة": مسلسل للتاريخ

أكدت الفنانة وفاء عامر أن شخصية شلبياية في مسلسل "حضرة العمدة" تعد عمل قائم بذاته، موضحة أنها تحقق نجاحا ولا تسأل عن حجم الدور ولكنها تهتم بالشخصية التي تؤديها.

وقالت عامر في مقابلة مع قناة "القاهرة الإخبارية" المذاع على قناة "القاهرة": "شلباية فتاة عندها 17 سنة وفجأة لقت نفسها زوجة لرجل عنده 70 سنة وعاشت معاه خادمة ولما مات بقت لوحدها؛ وبدأت أنها عايزة ترجع تاني؛ والناس شايفة أن عندها كتير وهي معندهاش حاجة".

وأضافت: "لمت كل الفلوس ودخلت في قصص غسيل الأموال وتجارة السلاح والمخدرات؛ وقالت إن دة اللي بيجيب الفلوس ولكن دا بيجيب الهلاك في النهاية؛ النصب والاحتيال والمتاجرة باحلام الناس والتجارة بالسلاح والمخدرات وأثرها بيجيب هلاك".

وتابعت: "المسلسل كله العالم كله بيعيش في الكفر دة؛ العالم العربي كله بكل الموبقات اللي بتحصل فيه من خلال الكسب غير المشروع أو قضية زواج صغار السن وتجارة السلاح والإرهاب والجماعات الإرهابية والتجارة بالدين واحلام الصغار".

وأكملت: "قبل كدة عملت مسلسل جبل الحلال بطولة النجم محمود عبد العزيز وأنا قلت إن المسلسل دة للتاريخ ومسلسل حضرة العمدة أيضا للتاريخ؛ أحنا عملنا مسلسل الطوفان وقدم خارج السباق الرمضاني واستمر العمل وأنا مبدروش أبدا ممكن أخرج من السباق الرمضاني وأعمل مسلسل يجيب نفس المشاهدات".

وعن دورها في مسلسل الملك فاروق قالت عامر: "أنا اعمل أي شخصية ولكن اللي كانوا خايفين هما اللي حواليا لأن أنا ثقافتي غير اللي بقدمه؛ أنا لما بعمل مثلا راقصة أنا اجيد فن التشخيص فبعمله ولكن أنا فنانة؛ أعمل خادمة اعمل الدكتورة أعمل القاتلة أعمل العانس أعمل الذكية أعمل عالمة الذرة اللي أمنية حياتي أعملها دلوقتي".

وأوضحت: "لما أجي أعمل الملكة وأنا بعمل أدوار بعيدة كل البعد عن دة فالناس استغربت؛ دور الملكة نازلي تشخيص وليها تفاصيل زي زوجات رؤساء الجمهورية ليهم تفاصيل دقيقة والحاجات دي كلها خدت مني مذاكرة وخلتني أجيب ناس عشان أذاكر دة".

واختتم: "كتير من الوقت بتأثير بالشخصية اللي بقدمها وكل الشخصيات اللي بقدمها تأثرت بيها؛ أمي عانت مني لما عملت دور البخيلة وأنا عمري ما كنت بخيلة في البيت".