محمد علي خير يكشف أسباب طرده من العمل في راديو مصر

كشف الإعلامي محمد علي خير عن سر طرده من العمل في راديو مصر مشيرا إلى أنه كان يعمل بالإذاعة خلال فترة حكم جماعة الإخوان الإرهابية.

وقال خير خلال استضافته ببرنامج "العرافة" المذاع على قناة "النهار": "كنت بشتغل في الإذاعة خلال فترة حكم جماعة الإخوان الإرهابية؛ والبرنامج كان عامل تأثير كبير وقتها وكل يوم ضاغطين عليا استضيف قيادات من الجماعة الإرهابية وكان فوقيا وزير اعلام جماعة الإخوان في هذا الوقت".

وأضاف: "الجماعة راحوا لمكتب الرئيس المعزول وقالوله خلاص الراجل دة لازم يمشي وفي يوم رحت قالولي خلاص أنت ماشي من بكرة والسبب كان إن أنا مش ماشي على خط الجماعة ومكانش البرنامج بيطلع من المدينة ولكن من مبني الإذاعة والتلفزيون".

وتابع: "وقتها لا كتبت بوست ولا طلعت على الفضائيات وقلت؛ ويوميها باليل كان راديو 9090 بيكلمني؛ رحت الراديو وكان لسة باقي على ثورة يونيو أسبوعين تلاتة واتصلوا بيهم قالولهم الراجل دة ميطلعش واتفقوا أني مطلعوش لحد 30 يونيو وبعديها نبحث أمره؛ قامت الثورة ولقيتهم بيكلموني تعالي".

وأوضح: "أنا مشيت من قناتين؛ قناة سي بي سي تو وقفلت؛ والقناة التانية القاهرة والناس؛ واختلفنا وإدارة القناة كان ليها تصور لتطوير البرنامج؛ أنا برنامجي على قناة المحور عليه 12 راعي؛ أنا طبيعية شخصيتي الإعلامية اناني ودخول أي زميل أو زميلة معايا ممكن مينقلش اللي أنا عايز أقوله".

وعن الرسالة التي يحتفظ بها على هاتفه ولا يريد أن يقرأها قال خير: "مازلت محتفظ برسالة من والدتي بعتتهالي قبل ما تموت وأنا مش عايز افتحها وهي رسالة وداع في أول سطرين وما معناه يعني أنها حاسة أن الأيام قربت يعني وكانت في المستشفى وكنت برفع من روحها المعنوية ومجرد فتح الرسالة هتفتح بوابات حزن لأن أنا كنت على علاقة خاصة مع والدتي الله يرحمها وأنا بكن لها كلها حب واحترام ومبحبش استعيد ذكريات هذا اليوم".

واختتم: "أنا قررت اعتزال الإعلام قريبا؛ أنا تعبت ومع ظروف صحية وحاجات كتيرة كدة فشايف أن الواحد يعتزل والناس حباه يعني؛ ضغط الراديو والقناة وظروفي الصحية ممكن متساعدش".