عمرو أديب: "الصين عملت فيديو إزاي تخلص على تايوان"

علق الإعلامي عمرو أديب، على توتر العلاقات بين الصين وتايوان على خلفية زيارة رئيسة تايوان إلى الولايات المتحدة وما تلاها من إجراء الجيش الصيني مناورات عسكرية بالقرب من الجزيرة.

وقال أديب خلال برنامج "الحكاية" المذاع على قناة "أم بي سي مصر": "الصين وتايوان؛ قصة قديمة جدا؛ تايوان بتكلم أنها جمهورية مستقلة والصين بتقول إن تايوان جزء من الصين؛ اللي بيجرا اليومين دول؛ كنا دائما بنقول هي الحرب الأوكرانية الصينية أثرت على المواد الغذائية ولكن أي حاجة تانية شغالة".

وأضاف: "اللي أنا هكلمكم عليه دة هو أي حاجة تانية؛ منطقة فيها صراع مسلح ومراكب وغواصات وتهديدات؛ دلوقتي في أي لحظة أحنا مهددين لو اضربت رصاصة في المنطقة دي انت في كوكب تاني".

وتابع: "الجيش الصيني ده حاجة لا يمكن يتخيلها الناس دي بتطلع مثلا 38 طيارة أو 40-50 سفينة في المنطقة دي لأنه مضايق من اللي بيحصل ومضايق من تايوان واللي ورا تايوان اللي هما الأمريكان".

وواصل: "الصينيين طلعوا يهزروا شوية ولو حصل أي حاجة المكان دة بيعدي فيه 50% من تجارة العالم وبعدين تجارة العالم مش حاجات بسيطة دي التكنولوجيا وأشباه الموصلات وأي حاجة صيني؛ أنظر حولك؛ هناك خطر الان نسبته قد تكون 10-15% ولكن وارد أنه لو حصل أي احتكاك أو أي مشكلة أنت هتشوف عالم أخر غدا".

وأوضح: "اللي بيجرا ده ليس سهلا وأن الصينيين مبيهزروش.. الصينيين عملوا فيديو كدة أزاي هيخلصوا فيديو كارتون معمول قالوا إن الصواريخ هتطلع من هنا وهنخلص على الجزيرة دي تماما هو بيقول للعالم أنا لو اتحركت هعمل كدة والصين مش سهلة".

وأكمل: "تايوان متخيلين أن أمريكا هتتحرك ولكن عندنا يتعلق الموضوع بالصين متهزرش.. دا نسبته صغيرة جدا وكانت وقت روسيا صغيرة جدا وضئيلة جدا والصينيين لما شافوا اللي الروس عملوه قالوا ما أهو ممكن يتعمل فالصين خلال تقول خلينا نخلص ونضم تايوان دي واللي عايز حاجة يكلمنا".

وأكمل: "اللي بيجرا ده حركته كدة بس أفتح بكرة الأسواق وبص بكرة على سعر الذهب؛ احنا في مصر يهمنا في ايه؟ نص تجارة العالم وكل حاجة حواليك الصين لما أتاوبت في الكورونا شفت الدنيا كلها وقفت؛ بحاول استرعي انتباهك لشيء خطر".

وعلق أديب على تصريحات الرئيس الفرنسي إيمانويل ماكرون والتي أشار فيها إلى أن أوروبا يجب ألا تكون تابعة للولايات المتحدة.

وقال أديب: "ماكرون وهو ماشي من الصين قال يا جماعة مساء الخير؛ أحنا ملناش دعوة بأمريكا بقي وقالك مش كل ما تبقي في مصيبة فيها أمريكا نمشي ورا أمريكا".

وواصل: "الراجل اللي بيمثل الاتحاد الأوروبي وهو ماشي من الصين بيقول لو أمريكا داخلة في أي حاجة أحنا مالنا مش لازم نبقى تابعين لأمريكا؛ دانت معاهم في حلف واحد وتجارة واحدة ومصير واحد؛ انما قالك ايه وهو ماشي من الصين؟".

وزاد: "أول ما جه بايدن قالهم بصوا أنا لا ليا علاقة بالشرق الأوسط ولا أفغانستان وقالك العدو الرئيسي لأمريكا هو الصين؛ الصين هي المشكلة والهدف والكارثة هو لا مهتم بشرق أوسط ولا اقصى ولا أمريكا اللاتينية".

وأوضح: "الصين أصبحت مع روسيا في حلف واضح دلوقت؛ ولو أنت جاي تسألني بعد اللي حصل بين أوكرانيا وروسيا جاي النهاردة تسألني الصين تأثر علينا في ايه يبقي الكلام دة مش ليك؛ لو المنطقة دي شبه اشتعلت ودا أمر حتى الان بعيد جدا ولكن التصعيد اللي بيحصل؛ بيطلعوا 80-90 طيارة استكشاف".

وأردف: "11 مركب و70 طيارة؛ اللي أنا بقول عليه دة مش اللي هو أنا شاطر وقريت الخبر؛ دا الدنيا مقلوبة هو مش عندنا مهم أوي ولكن اللي بقول عليه دة الخبز والذبد بتاع كل وكالات الانباء لو حصل حاجة في المنطقة دي حرب أوكرانيا وروسيا تقولها يا بابا".

وختم: "جايز ربنا يهديهم وكلهم يرجعوا كدة؛ طبعا أنا لا بكلمك على دور كوريا الشمالية ولا حلفاء الصين ولا الأسطول الأمريكي في المحيط الهادئ ولكن بقولك المراكب والطيارات الصينية طلعت تتفسح".

وكان الرئيس الفرنسي إيمانويل ماكرون قد دعا أوروبا إلى عدم "الدخول في منطق الكتلة مقابل الكتلة"، مشددًا على ضرورة ألّا تكون "تابعة" للولايات المتحدة أو للصين فيما يتعلّق بتايوان، وذلك في مقابلة مع احدى الصحف الفرنسية.