المنتج محمد مختار يرد على اتهامات رانيا يوسف بعدم الإنفاق على بناته

أكد المنتج محمد مختار، أنه لم يحاول العودة إلى زوجته السابقة الفنانة رانيا يوسف مشيرا إلى أنه نصحها بالتريث قبل الطلاق ولكنها أصرت.

وقال مختار في مقابلة مع برنامج "حبر سري" المذاع على قناة "القاهرة والناس": "احنا الاتنين مرضيناش نرجع لبعض؛ أنا في أول الطلاق قلتلها تريثي شوية وشوفي اية الحكاية وقالت لا أنا عايزة انفصل؛ انفصلت وبعد شوية بقت مش مبسوطة خالص؛ طلعت من أمان جامد وكنا عايشين كويس".

وأضاف: "هي محاولتش ترجع تاني وأول ما أطلقنا كنا أصحاب جدا؛ أربع سنين وفي الجوازة التانية جالها واحد وكانت مش لطيفة أوي وبعد كل أصحابها اللي بيخافوا عليها عنها وابتدا يلعب لعبته لغاية مهيا قفشت الحكاية ومن أول التاني دة بقي ابتدينا المشاكل الجامدة وهو أثر عليها جامد".

وتابع: "كان عنده ابن يبعت لبنتي صور مش لطيفة وكلمته قلتله ليه بيبعت لبنتي ده قالي أعمل اللي تعمله ورحت رايح القسم وعملت محضر؛ أنا دخلت القسم وطلعت ولقيت مفيش حد في مصر إلا وبيتكلم في الموضوع دة؛ أنا مكنتش عايز كدة ولكن أنا فضحته".

وأكمل: "أنا كتبت وصيتي ووزعت أموالي وممتلكاتي على بناتي وأبني؛ وأنا مملكش ورقة من دول في حياتي؛ علاقتي ببناني الصغيرة كويس أوي والكبيرة مع مامتها شوية لو مامتها زعلانه تزعل شوية".

وعن الاتهامات بعدم الإنفاق على بناته من الفنانة رانيا يوسف قال مختار: "احنا كنا متفقين عند الأستاذ فريد الديب المحامي أننا منتكلمش عن الكلام دة".

وواصل: "هي كانت بتقول إنها متكلفة بمصاريف بناتها وأنا معايا ورق رسمي من المحامي بتاعها؛ مش المحامي قال تحطلنا كل شهر كذا؟ دا موجود عندي برقم الحساب في البنك؛ انا مستور مش راجل غني جدا؛ أنا مستور أكتر من أهلي".

واختتم: "الأفلام كانت بتصرف بجنون؛ إيرادات جنونية والمصروفات بردو كانت جنونية؛ كل اللي اطلب مني عشان البنات في دفع أنا دفعته؛ المدارس أنا دفعتها قبل القضايا وبعدها والأكل والشرب والنوم ومحولها فلوس في حسابها والمحامي قالي كل شهر تحطلها كذا؛ أكل وشرب بس 15 ألف والتعليم 700-800 في السنة؛ أنا اتعلمت من ابتدائي للجامعة بألف جنيه".