المنتج محمد مختار: "كان نفسي أعمل خلطة السبكي ومعرفتش"
أكد المنتج محمد مختار، أن المنتج أحمد السبكي كان يعمل بمفردة في السينما في ظل عدم وجود أفلام في السوق على الإطلاق.
وقال مختار في مقابلة مع برنامج "حبر سري" المذاع على قناة "القاهرة والناس": "لو كنت أعرف أعمل زي خلطة السبكي في إنتاج أفلامه كنت عملتها؛ عشان الإيرادات وكان في وقت مفيش سينما خالص والراجل دة كان بيشتغل بفلوسه؛ الأفلام دي اتعملت في السريع وخلال أربع أيام العيد يكون غطي الموضوع".
وأضاف: "ياريت أعرف اعملها؛ كنت مستعد أشتغل عنده مساعد وأتعلم بتتعمل ازاي؛ أنا معرفتش أعمل دة ومعرفش ياريت أعرف؛ دا أكل عيش والسينما فن وتجارة وهو كان تاجر شاطر؛ أنا كنت تاجر شاطر جدا وصانع أفلام شاطر جدا ودا مش غرور؛ أنا كنت شاطر في اختيار الأفلام جدا".
وتابع: "أول فيلم عملته كنت حاجة وعشرين سنة كان الباطنية؛ كان نادية ومحمود ياسين وفريد شوقي وعماد حمدي وحسام الدين مصطفى مخرج والناس دي وقفت جنبي وفي كل حته بروحها بشكر الناس دي أنها وقفت جنبي وأنا واحد مش معروف خالص".
وأكمل: "الإنتاج تجارة وفن والاتنين لما يجتمعوا يبقي كويس أوي؛ انتاجاتي ضخمة وإيراداتي ضحمة ولكن الإيرادات في أفلام ممكن تعمل إيرادات أكتر من كدة وكنت صارف عليها كتير أوي؛ زي فيلم قضية أمن دولة اتعمل في 5 بلاد في أوروبا ومهما جاب إيرادات مش هيغطي".
وواصل: "نادية الجندي كنا زوجين وبعد الانفصال بقينا أصحاب جدا وأحسن 100 مرة ودي حاجة جميلة جدا وفي السينما والاعلام الناس تبقى ملمومة على بعض وقت الشغل ودول يمشوا ويجيوا ونتقابل في الحاجات الحلوة والوحشة؛ لو في عزا مثلا تلاقي كل الناس جات".
وأوضح: "كانوا أصحابي جدا فاروق الفيشاوي الله يرحمه وممدوح عبد العليم وهشام سليم؛ محدش من اللي أنا انتجت ليهم قل بأصله معايا كلنا كنا أصدقاء وقت التصوير وأنا كنت بشتغل في السليم على طول ومعملتش خناقة مع حد؛ كنت بسأل على هشام سليم قبل وفاته على طول ومكنتش بتكلم كتير لأن المرض بالذات اسئلته محرجة جدا؛ ممدوح عبد العليم قبل ما يتوفي بـ3 دقائق كنا مع بعض في نادي الجزيرة".
واختتم: "ممدوح عبد العليم قالي أنا معروض عليا ليالي الحلمية ستة وأنا قلتله الورق اللي يحدد وقالي هبعتلك الورق وتشوفه ومشيت وبعد 15 ساعة قالي تليفون بأنه اتوفي".
