محمد فؤاد يرد على هجوم حلمي بكر: "أنت مين عشان توجهني؟"
رد الفنان محمد فؤاد على هجوم الملحن حلمي بكر عليه بعد غنائه اغنية من نوع "المهرجانات" مشيرا إلى أنه لا يحتاج إلى توجيه من أحد.
وقال فؤاد في مقابلة مع برنامج "العرافة" المذاع على قناة "النهار": "الاغنية جميلة والشباب اللي عملها رائع وولاد منطقة شعبية؛ أنا بتاع كمننا وبتاع الدم دا دمي وانا بتاع أي حاجة محدش يفرض ولا يوجه أنت مين عشان توجهني".
وأضاف: "أستاذ كبير وعلى راسي وليس إله؛ أنا راجل متلزم بأقصى درجات الأدب والأخلاق بيني وبين زملائي عشان محدش يتجرأ ويعدي دة معايا؛ اللي بيحترم بيحترم نفسه؛ أنا مبجيش عند شغل حد وأنظر عليه أقوله كان مفروض تعمل ومتعملش مش موضوعك".
وتابع: "اغنية نزلت للناس هيسمعوها لو حلوة ومش هيسمعوها لو وحشة؛ انت متقدرش تحدد أنا ممكن اتعامل مع مين؛ إذا كان الشباب دول بيتجاوز في ألفاظ الأغاني لابد أن نحتضنهم وننقي الكلام الحلو ونغنيه".
وأكمل: "لازم نحتضن دول؛ الأستاذ عبد الحليم حافظ اشتغل مع كل جديد كان بيطلع؛ لو قلنا دي كمننا أفج منها؛ دي مش غلطة وأنا مبعملش غلط مبعرفش أعمل الغلط ممكن يبقي ليا مشروع معين أني أعدل حاجة معينة ولابد تحترم فيا أني أجيب الشباب دول بدل ما هما تايهين".
وأوضح: "هنفضل احنا نتفرج عليهم ونقول طيب ما هم ناجحين ومكسرين الدنيا؛ أنا بتكلم على الفئة دي؛ أنا مقلتش عمر كمال هينجح أكتر مني 50 مرة؛ أنا مقلتش كدة ومبقارنش محمد فؤاد بحد".
وواصل: "عمر بيجيلي من وهو طفل قدام الاستوديو ويتصور معايا ويشرب حاجة ساقعة وكان بيجي هو وخاله من وهو طفل ومتربي حياته محمد فؤاد؛ أي حد عاقل يقول محمد فؤاد ممكن يزعل من واحد زي عمر كمال؛ أزعل من طفل؟ أقولك عيل كان بيجي؛ طفل صغير من وهو طفل بيحبني".
وكان الموسيقار حلمي بكر قد هاجم الفنان محمد فؤاد على خلفية قيامه بغناء اغنية من نوع المهرجانات باسم "في الحفلة".
بكر قال مهاجما محمد فؤاد: "أنت حر.. بس أنت بِعت نفسك بالرخيص، وبعد كده هتعيط، أنت دلوقتي مش حاسس بحاجة لكن بكرة العياط هيملى المكان تحت رجليك".
