مصطفى كامل: النقابة تدخلت في أزمة شيرين والأسرار العائلية لا يجب الإفصاح عنها
أكد الفنان مصطفى كامل؛ نقيب المهن الموسيقية؛ أن النقابة تدخلت في مشكلة الفنانة شيرين عبد الوهاب مشيرا إلى أنه تدخل خلال تواجدها في المستشفى.
وقال كامل في مقابلة مع برنامج "حبر سري" المذاع على قناة "القاهرة والناس": "أنا تدخلت كتير ومكناش فاهمين المشكلة فين؛ وأنا بقالي فترة منقطع عن أخبار شيرين؛ وأنا معرفش المشكلة فين دلوقت دي أسرار عائلية عيب أتدخل فيها".
وأضاف: "أقول لشيرين انتي فنانة كبيرة جدا والمفروض في الوقت الحاضر تبقي رمز كبير اوي لمصر ويا خسارة شوية الحاجات دي عطلت كتير في مشوارك؛ ربنا يعيدك لفنك ولصوابك بالسلامة".
وعن لقائه بمغني الراب ويجز قال كامل: "التقيت ويجز ومدير أعماله؛ طلبوا مني طلب غريب أنهم يقابلوني لوحدى شخصيا وبعدين دخل زملائي ولقيته متحفظ في الكلام ولقيته شب جميل جدا ولكن بيتكسف وبعدين كلمني حد صديقي وقالي ويجز ومدير اعماله عايزين يجولي بيتي وقلتلهم يجيوا ويشرفوني وقعدنا زي ما قعدت مع عفروتو ومروان موسى وكلهم وكانت قعده كأني قاعد مع ابني".
وتابع: "ويجز قالي كانوا بيعاملونا وحش في النقابة وأنا قلتله متشغلش بالك؛ والمعاملة فعلا كانت معاهم وحشة؛ أنا معايا أدلة بالابتزاز والضغوط على الولاد دول ومفيش حد دخل مكتبي من الشباب دي ألا ما قالي اتعمل معانا كذا وكذا؛ ويجز قالي إنه تعرض لما يشبه الاهانات في بداية مشواره".
وأكمل: "حسن شاكوش قالي كان بيحصل معاهم حاجات وكل الحاجات دي في النيابة العامة والأموال العامة؛ وفي أمور انا مش هقدر اتطرف فيها؛ حسين شاكوش ومدير أعماله قالولي كانوا بيخدوا منهم عن كل حفل 12 ألف جنيه في أوقات كانوا بيشتغلوا خميس وجمعة وسبت وأحد؛ كل دة في الشهر على تقديرهم من حسن بس بدون إيصالات".
وواصل: "الكلام دة في التحقيقات ومعايا اعترافات اتقدمت لمجلس التأديب والقضية موجودة في الأموال العامة وأناشد النيابة العامة بسرعة اتخاذ الإجراءات؛ الفلوس اللي بتتاخد دي كانت بتروح لناس معينة وأنا عارفهم بالاسم ومحالين للنيابة بالأسم".
واختتم: "واحد من المتهمين كان باعت لحمو بيكا أعمل دعاية للمكان الفلاني في مارينا عشان أنت الخميس الجاي هناك وكل دة بدون مقابل؛ مفيش حد جالي من بتوع شعبة الأداء الصوتي أو الراب ألا ما قالي اتمارست علينا كل أنواع الفساد".
