بعد وصفه بـ"سيد قشطة".. محمد فؤاد يرد على طارق الشناوي: "احترم نفسك"
هاجم الفنان محمد فؤاد؛ الناقد الفني طارق الشناوي على خلفية وصفه إياه بـ "سيد قشطة" بسبب زيادة وزنه مشيرا إلى أن الوصف خارج حدود اللياقة.
وقال فؤاد في مقابلة مع برنامج "العرافة" المذاع على قناة "النهار": "الوزن عقدة مش عارف اتخلص منها؛ لكن ايه العيب؟ يعني ايه سيد قشطة؟ دانا اسجنك لازم تبقي مؤدب أنت كدة مش متربي ولا شفت تربية أنا لا أجرؤ على أني أقول على حد كدة".
وأضاف: "أنا أطلع أقول عليه قرد مثلا؟ بتعلم جيل من وراك صحفيين ايه؟ لما قابلتله في السعودية مسكت نفسي كنا ضيوف في السعودية وجاي يسلم عليا هديله بالقلم يعني؟ بيقولي أنت زعلان؟ قلتله مش زعلان الجمهور زعل وأنا عمال أكظم غيظي عشان معملش مشكلة".
وتابع: "أنا نجم وغصب عنه مازلت نجم؛ لما عملنا اسماعيلية رايح جاي قال دا عامل زي ما يفرزه الطفل بعد ما ياكل بساعتين؛ مش فاهم أنت متعلم فين؛ أنا بجيب بس العقدة فين؛ كتب كدة وما شاء الله لا وقفت الجمهور عن مساندة الفيلم أو عن محمد فؤاد".
وأكمل: "رحت فرنسا بيعرضوا الفيلم في المركز العربي؛ ورحت أسبوع بتذكرة غير الدعوة عشان أقعد حر نفسي صاحبي جاي بيقولي دا الشارع مقفول عشان الناس عايزة تتفرج على الفيلم؛ دخلت من ورا الناس ولقيتهم في الساحة اللي برا وناس قاعدة في الأرض".
وواصل: "دخلت ولقيت الناس كلها واقفة بتصقفلي ولا كأني في كان؛ ولقيت بعد ما خلص الفيلم الصحفيين مقلوبين عليا والتاني بقي واقف وبينادي بيقولي محمد وعامل فيها صاحبي وانا معرفوش وقلتله شوف دا ربنا شوفت أنت كتبت ايه؟ وانت معاك بقي ربنا يتولاك".
واختتم: "انسان غريب الشكل وأنا مش عارف أعمل ايه؛ أقابلك في السعودية أزعلك مني ويبقي شكلنا وحش قدام الناس والا اعمل معاك اية؟ احترم نفسك كفاية كدة؟ دا مصلحته اية يكسر في تاريخ زي محمد فؤاد؟ أنا حزين أن دول بيكسروا في كل انسان اجتهد وهو مبيعجبوش ألا حاجات معينة وأي حد نضيف بيشوفه زي ما هو شاف".
