حمو بيكا: "عمر كمال عملي عمل عشان مشتغلش"

قال مطرب المهرجانات حمو بيكا؛ إن والدته كانت سعيدة بعد حصوله على بطاقة عضوية نقابة المهن الموسيقية مشيرا إلى أنها قامت بتوزيع الحلوى احتفالا بذلك.

وأوضح بيكا خلال مقابلة مع برنامج "العرافة" المذاع على قناة "النهار": "عمر كمال كان عامللي سحر؛ ورحت لشيخ وقالي في حد اسمه عمر عاملي السحر وقالي كلكم هتقعدوا وهو بس اللي هيشتغل ودة اللي حصل".

وأضاف: "الشيخ فكللي السحر؛ وبقيت بشتغل وبعد كدة بقيت مصاحب عمر كمال عشان ميعمليش حاجة تاني وربنا يستر بعد ما يعرف النهاردة ويكرر الموضوع تاني؛ أنا لابس الفانلة بالمقلوب عشان السحر؛ خايف من العمل".

ونفى حمو بيكا قامه بخيانة زوجته مضيفا: "كنت لابس سماعة ورنت على مراتي وفتحت وكنت بقول للبنات دا يوم جميل ويوم حلو؛ ودول كانوا بنات صحاب صحابي والبيت اتكسر".

وعن خلافه مع الفنانة شمس قال بيكا: "أخو الفنانة شمس وقفني وقالي أنا أخو الفنانة شمس وعايز أتصور معاك؛ وأنا قلتله معرفش مين شمس واتصورت معاه وبعدين هو راح وصلها أني مردتش أتصور معاك وعملت فيديو وشتمني وبعدين أنا اعتذرت ليها".

وتابع: "أنا عمري ما استلفت من حسن شاكوش دا ناشف نشفان السنين؛ دا قاللي هجبلك تكييف هدية ولا جابلي تكييف ولا نيلة".

وأوضح: "أنا كنت بقول لحسن شاكوش تعالالي إسكندرية ومكانش بيجي وبعدين قالي تعالالي أنت ورحت له حدائق الاهرام وياريته قدرني؛ حتى حد من زمايلي اتمسك ومجاليش ولا قدرني؛ هو اصفراوي".

وواصل: "في الأول مكنتش أعرف يعني ايه نقابة ومصنفات؛ طالما بيسمعني 200 ألف يبقي كويس ولو هنزل أغنية تجيب 10 ألاف كويس؛ وربنا يخلي الفنان مصطفى كامل نقيب الموسيقيين؛ لو أنا بغني كلام وحش مش هينفع تجبيني فرح؛ مش احنا بس اللي بنغني دلوقت وأنا مش بقول اني رقم واحد أنا قلت أنا المدرسة".

واختتم: "علمت ناس وناس طلعت وناس ظهرت؛ حسن شاكوش جالي وعمر كمال جالي وعنبة جالي وعصام صاصا جالي؛ أنا اسمي حمو بيكا وايه المشكلة أني أبقى أداء صوتي المهم باكل عيش".