عبير صبري: الهجوم على ريهام حجاج مدبر من لجان إلكترونية

قالت الفنانة عبير صبري؛ إن الهجوم على الفنانة ريهام حجاج "مدبر"، موضحة أن هناك لجانا إلكترونية تحاول جعل المناخ حولها سيء ولكنها لا تعرف السبب.

وأوضحت صبري في مقابلة مع برنامج "حبر سري" المذاع على قناة "القاهرة والناس": "أنا مش عارفة سر الهجوم عليها ولكن تحسي أنها مدبرة؛ في لجان الكترونية وبيحالوا يخلوا المناخ حولها مش حلو؛ ريهام حجاج فنانة جميلة وموهوبة وصادقة ومحبة للناس اللي حواليها".

وأضافت: "هي بنت ناس ومحترمة وجميلة وهادية وفي حالها وفي الشغل جميلة وبتحترم كل الناس ومبتدخلش في أي حاجة وهي مجتهدة في شغلها وبتتعب عشان تدور على ورق وكل ما يقال على ريهام مش مظبوط بالمرة".

وتابعت: "هي مش مهتمة بالسوشيال ميديا خالص؛ وبقولها خلال تصوير المسلسل نزلي صور تقولي المسلسل كدة كدة هينزل ومش مهم؛ هي من الشخصيات الهادية وعايشة حياتها الشخصية وبيتها وشغلها ومبحسهاش شخصية متفاعلة مع السوشيال ميديا".

وأكملت: "يوسف الشريف ضد التلامس هو حر دي وجهة نظره ومنقدرش نلوم الناس على أفكارها؛ أنا من قبل الجواز وعندي قرارات أن في حاجات ينفع أعملها وحاجات أنا مش عايزه أعملها؛ أنا مش بتكلم في الدين ولكن كل واحد في مهنته بيقابل حاجات حلال وحاجات حرام".

وأوضحت: "الفن هو الجمال والخيال والابداع؛ أنا رافضة التلامس من بعد ما قلعت الحجاب بفترة؛ أنا قراراتي باخد العمل اللي مناسب أن أعمله".

وواصلت: "أنا نفسي أشتغل مع الأستاذ داوود عبد السيد وأتمنى أنه يشوفني بطلة من أبطال الحواديت بتاعته؛ هو معتزلش ولكن هو بيقول فرض عليا الاعتزال لأن انتاجيا ممكن يكون في مشاكل ولكن أنا بقوله مينفعش أبدا يعتزل لأن الفن العظيم اللي بيقدمه مينفعش يبقي مش موجود هو ليه جمهور وأنا بتمنى أشتغل مع داوود عبد السيد".

واختتمت: "معنديش حد أشتغلت معاه وشايفة مثلا أني ندمت ممكن تشتغلي مع مخرج تكون التجربة ناجحة جدا أو محدودة النجاح؛ انا اشتغلت مع أستاذ سامح عبد العزيز 3 اعمال درامية وفيلم سينما وأتمنى أشتغل معاه تاني أكيد".