أول تعليق من عمرو أديب على فوز الأهلي أمام الهلال السوداني: رجعوا الجمهور

علق الإعلامي عمرو أديب؛ على تأهل الأهلي إلى ربع نهائي دوري أبطال أفريقيا بعد تغلبه على الهلال السوداني بثلاثة أهداف نظيفة في ختام دور المجموعات.

وقال أديب خلال برنامج "الحكاية" المذاع على قناة "صدى البلد": "حسين الشحات بيعمل كورة بقاله زمن معملهاش؛ جايب جول فليتو؛ موز موز وبقالنا مدة مشفناش التمويهة والترقيصة؛ الراجل نزل نص ساعة جاب جولين أنا قلتلكم الأهلي هجي بالتاني والتالت والحمد الله أن احنا على الهوا مش تسجيل وأنا قايلكم من أول ما دخلنا الهوا أن الأهلي هيجيب التاني والتالت".

وأضاف: "مرة تانية شكرا للجمهور المصري والجمهور زي ما دخل بسلام وأمان يخرج بسلام وأمان وهو المفروض متبقاش شيء نشكر عليه حد أنت داخل ماتش زي العالم كله زي ما شفنا النهاردة مانشستر سيتي وليفربول".

وتابع: "مبروك بجد للنادي الأهلي وياريت بقي ارفعوا الحواجز عن الجمهور؛ رجعوا الجمهور يغرد لكل الفرق والناس في لعيبة دخلت الكرة وخرجت مشافتش الجمهور دة خلاص بقي ان شاء الله تبتدي الجهات الأمنية بقي ونشكر الناس اللي بذلت جهود في الموضوع دة وان شاء الله تبقى فتحة خير ومبروك للنادي الأهلي".

وواصل: "عايزين نهني النادي الأهلي تلاتة صفر وألف مبروك جولين لحسين الشحات وجول لكهربا وبهني جمهور النادي الأهلي وياريت الأهلي يشم نفسه شوية وبلاش الحاجات اللي تبقى زانقة دي".

وأوضح: "حالة فرح وتحسن أن الأهلي النهاردة استطلع الهلال؛ الجماهير في شوارع مصر في سعادة غامرة وفرحة غير طبيعية؛ ايه المشكلة يدخل 70 ألف الاستاد ويخرجوا عادي ويخدوا المواصلات إلى بيوتهم ويتسحروا مبسوطين بعد ما فطروا في الاستاد أكبر فطار جماعي".

وأكمل: "الجول الأول عالمي أنا رأيي أن محمود كهربا جاب جول من بتوع محمود الخطيب؛ والكرة بتالعة حسين الشحات اللمة والترقيصية والركنة شيء عظيم".

وحقق الأهلي فوزا غاليا على الهلال السوداني بثلاثة أهداف نظيفة سجلها محمود كهربا وحسين الشحات "هدفين" ليتأهل الفريق الأحمر عن المجموعة بعد أن جمع 10 نقاط في المركز الثاني خلف صن داونز الجنوب أفريقي متصدر الترتيب.