تامر أمين: "مقبلش أكل لحم حمير لكن غالبا أكلته"
علق الإعلامي تامر أمين؛ على الاتهامات الموجهة إليه بدعوة المصريين إلى تناول لحوم الحمير والخيول، مشيرا إلى أنه لم يقل ذلك على الإطلاق.
وقال أمين خلال برنامج "العرافة" المذاع على قناة "النهار": "أنا قعدت اتفرج على الفيلم العربي اللي حصل طول الأسبوع على موضوع الخيول والحمير ده وقعدت أتفرج وأنا مبتسم ومبسوط ومردتش أتفاعل".
وأضاف: "قصة الحمير والخيول كاشفة للي بيحصل في حياتنا؛ نحن في زمن السوشيال ميديا بامتياز؛ السوشيال ميديا هي اللي بتحرك وتوجه وهي صاحبة الحقيقة المطلقة وأي حد بعد كدة ميفتحش بوقه".
وتابع: "أنا قلت ليه مبناكلش لحم حمير؛ مش تامر أمين يدعو المصريين لأكل الحمير ودي القصة اللي قلبت الموضوع رأسا على عقب؛ والقصة مبنية على أن جزار باكستاني اتقبض عليه في المنصورة وهو بيبع لحم خيول؛ الراجل وهو بيتقبض عليه قال أنا ياجماعة ببيع لحم خيول".
وواصل: "أنا قلت ليه مبناكلش لحم خيول ودا كان سؤال استفهام؛ أنا بعدها على طول جبت دكتور تغذية علاجية وسألته اللي بياكل لحم حمير أو خيول بيحصله حاجة؟ قالي علميا مفيش مشكلة وقلتله لازم نسأل أهل الفقه يقولولنا لحوم الفصيلة الخيلية حلال والا حرام".
وأكمل: "القناة حذفت الفيديو من وسائل التواصل الاجتماعي ربما خوفا من الهجوم وبيحموني ويحموا نفسهم؛ أنا من وجهة أني مغلطتش والدليل أن الحملة اللي بعد رمضان لماذا لا يأكل المصريين الحشرات".
وأوضح: "لما يجي خبر متعلق بالجزار الباكستاني دة وناس أكلت من عنده حمير وأحصنة لازم نفتح الموضوع ونقول ليه مبناكلش دة؛ حلال والا حرام؟".
وذكر: “أنا مقبلش أكل لحم حمار بس غالبا أكلته؛ أنا مش عايز الناس تاكل لحم حمير أنا سألت لماذا لا يأكل المصريون لحم الخيول والحمير؛ وأنا مش باكل لحم الحمير عشان حرام لما دار الإفتاء طلعت بيان ودي معلومة أنا مكنتش أعرفها”.
ورفض أمين الاعتذار عما قاله مضيفا: "أنا مش هعتذر؛ لما تعمل شغلك أنا مش مسؤول عن التأويل بتاعه؛ حذف الفيديو من وسائل التواصل الاجتماعي معناه نشيل وجع الدماغ؛ ورغم احترامي لقرار القناة أنا مسؤول عن كلامي وطالما أنا بعمل شغلي صح مليش علاقة".
