لوسي: جنية المداح "بتلازمني" وموجودة تحت الأرض
كشفت الفنانة لوسي؛ عن تعرضها لبعض الأمور الغريبة خلال عملها بمسلسل "المداح" والذي تقوم فيه بدور ملكة من ملوك الجان.
وقالت لوسي خلال برنامج "العرافة" المذاع على قناة "النهار": "رحنا نصور في الفيوم وعملنا ميك أب وكل حاجة وقلت هلبس لبس الجنيه في الفيلا بتاعة صابر والجو حلو جدا وقبل ما ندخل بتلات أربع دقائق لقيت مساعد المخرج بيقولي أرجعي على الاوتيل في عاصفة والشجر بيخبط في بعضه وقلتله أنا داخلة على الفيلا".
وأضافت: "دخلت لقيت الرموش اللي أنا مركباها بتتحرك من الهوا ومشيت ومصورتش؛ الشخصية اللي أنا بلعبها عاملة شغل معايا؛ أنا واخدة شخصية الجنية الحقيقة وكل حاجة وأنا قريت حاجات عشان أعمل الدور".
وتابعت: "هند بنت الأحمر موجودة؛ وبتلازمني موجودة تحت الأرض؛ لازم تقري قرأن أنا أقول المشهد من هنا وأقرأ قرأن؛ في جن طيب أو جنية طيبة ومسالمة وفي جن شرير وعشان أعمل الدور دة في المداح كان لازم أعرف شكلهم ايه في كتب وحاجات تعرفي منها الكلام دة".
وأكملت: "أوعوا حد يجرب؛ وهما بيروحوا فين؟ الجن الطيب بيروح لما تعملي عمل خير؛ تبقي ماشية في صحرا أو حته مقطوعة والكوتش يضرب تلاقي حد غريب في عربية جاية وتساعدك وتيجي تشكرية متلاقيهوش".
وأوضحت: "أنا ذاكرت هند بنت الأحمر وأنا بعمل حاجة من العالم الخفي وموجود في القران؛ عرفت أن الشريرات منهم ضعفاء جدا بيروحوا للناس اللي نفسيتها شريرة".
وواصلت: "شيء صعب أوي أنك تشخصي شخصية زي دي ولكن أنا بقرأ قرأن وبصلي وبشغل إذاعة القرأن الكريم؛ الحاجات دي بتخليهم محلك سر؛ بس يبعتوا حد يخضك".
وأحنا في الفيوم رحت صورنا تاني وكنت أنا والماكييرة بتاعتي قاعدين بنتفرج على التلفزيون فجأة التلفزيون وقع وأنا وهي بصينا لبعض".
وتقوم لوسي بدور ملكة من ملوك الجان في مسلسل المداح "أسطورة العشق" الذي يقوم ببطولته الفنان حمادة هلال "الشيخ صابر" وعبد العزيز مخيون ومحمد رياض وهبة مجدي.
ويتناول المسلسل علاقة البشر بعالم الجان الخفي والصراعات بين البشر والجان والتداخلات التي تحدث بين العالمين.
