زوجة حسن شاكوش توضح أسباب "سجدة الزفاف"
ردت ريم؛ زوجة مطرب المهرجانات حسن شاكوش؛ على الانتقادات التي وجهت لها بعد أن سجدت شكرا لله خلال حفل زفافها.
وقالت ريم في مقابلة مع برنامج "العرافة" المذاع على قناة "النهار": "قبل ما نتخطبت أنا وحسن كنت وقعت في كذا مشكلة وبقيت أصلي قيام الليل وكل يوم أدعي يارب انجدني وابعتلي الشخص الصح وفجأة لقيت والدتي بتقولي حسن جاي يتقدم".
وأضافت: "كنت كل يوم بعد موضوع الخطوبة وقيام الليل أسجد ركعتين شكر لله وكان صعبان عليا أني ملهية في موضوع الفرح ومبصليش وكان أسبوعين قبل الفرح كنت مركزة أني أثبت للناس أن ربنا بيعوض؛ لازم ومفيش حاجة أسمها أنتي تتظلمي ومبتخديش حقك".
وتابعت: "كل تركيزي كان أني أسجد؛ الفستان يبوظ أو الميك أب يبوظ؛ وأصلا مكانش في حد في القاعة؛ كان قبل الفيرست لوك؛ وكويس أني مسجدتش قدامه عشان كنت هشيله ذنب".
وأكملت: "ولا أهلي ولا أهل حسن ولا أصحابي ولا حد في الدنيا كان يعرف وأنا كنت عايزة أثبت للناس أن في تعويض ومكانش في غير نور منظمة الزفاف وقلتلها أنا نفسي في دة وقالتلي مش هينفع هتتبهدلي وأنا قلتلهم يا جماعة انا عايزة أعمل اللي نفسي فيه وبعد ما قمت قلتلهم يا جماعة أنا ارتحت".
وعن الهجوم الذي تعرضت له بسبب سجدتها خلال حفل الزفاف قالت زوجة شاكوش: "اللي مع ربنا مش بيشغله حد؛ أنا مش شيخة أنا بحب أقرب من ربنا وبرجعله حتى لو مش دايما ومبعرفش أعيش كدة أنا ليا رجعة ورجعتي عند ربنا؛ ودي حاجة مينفعش أعمل بيها شو".
وأوضحت: "مكنتش متفقة مع حسن على دا وكدة كدة الفرح كان هيطلع تريند دا حسن شاكوش ومكناش محتاجين دة وأنا معرفش يعني أيه تريند".
وتعرضت زوجة حسن شاكوش إلى سيل من الانتقادات بعد واقعة سجودها خلال حفل الزفاف؛ حيث أكد المنتقدين أن السجود بهذا الشكل وبملابس الزفاف غير لائق فيما أشار البعض إلى أن الهدف من الأمر هو تحقيق "تريند" على وسائل التواصل الاجتماعي وإثارة الجدل لدى الجمهور.
