أحمد موسى يعلق على خسارة الزمالك أمام البنك الأهلي: "اللاعيبة مستهترة"
علق الإعلامي أحمد موسى؛ على خسارة الزمالك أمام فريق البنك الأهلي بثلاثية نظيفة وإقصائه من بطولة كأس رابطة الأندية.
وقال موسى خلال برنامج "على مسؤوليتي" المذاع على قناة "صدى البلد": "لما يبقي عندك إدارة جهاز فني قاعد على الخط برة؛ الجهاز الفني شغلته يدرب اللاعيبة ويجهزهم لخوض المباراة؛ وأنت قاعد على الخط أكيد تقرأ الملعب قدامك وشايف اللاعيبة بتتحرك ازاي مين كويس ومين مش كويس".
وأضاف: "اللي حصل في ماتش الزمالك والبنك الأهلي اللي خلص من شوية والبنك الأهلي جاب 3 أهداف في سبع أو تمن دقائق؛ البنك الأهلي يفكرك وكأن الزمالك بيلاعب فيلامنجو أو البايرن أو البرازيل أو ريال مدريد".
وتابع: "البنك الأهلي يسجل في الزمالك 3 أهداف في سبعة أو تمن دقائق دا مبتحصلش يا جماعة ومبيكررش؛ المصيبة اللي حصلت النهاردة للزمالك لا تتكرر كثيرا؛ مع احترامنا للبنك الأهلي بتكلم عن كرة قدم؛ أنت كمدير فني تدير مباراة الزمالك والبنك الأهلي بتطلع تلات أربع لعيبة هما اللي بيلعبوا أحسن؛ نيمار بيلعب كويس وسيف جعفر بيلعب كويس ومنسي بيلعب كويس يقوم واخد التلاتة مطلعهم".
وأكمل: "بتنزل الشوط التاني متراجع مش شايف أنك بتلعب مباراة كأس؛ فتتغلب وتخرج ويبقي موسم صعب عليك موسم كارثي عليك ودا بسبب ايه؟ الراجل اللي قاعد برة؛ لما تشوف كدة تسحب اللاعيبة الكويسة وتنزل لاعيبة للأسف الشديد 3 أهداف دخلت في نادي الزمالك خلال ست أو سبع دقائق".
وأوضح: "أنا في مداخلة في البرنامج 8 دقائق دخل تلات أهداف؛ هو في كدة يا جماعة؟ اللاعيبة اللي بتلعب النهاردة باستهتار؛ ضيعوا الشوط الأول وجالهم أكتر من فرصة كان ممكن يخلصوا؛ الشوط التاني لاعيبة مستهترة وعندك جمهور مستنيك أنك تغلب ولكن حتى الأن موسم صعب جدا على فريق نادي الزمالك".
واختتم: "المباراة بالنسبة للزمالك من المباريات السيئة؛ لاعيبة نادي الزمالك مبيعملوش بالفلوس اللي بيخدوها؛ البنك الأهلي اللي عمله النهاردة شيء لازم يتشاف ازاي الأهداف دي التلاتة يجيوا في الدقائق القليلة مبيعملش كدة ألا فريق مختلف؛ مين بيعمل كدة؟ دا معناه حاجة واحدة أنت نادي الزمالك لم يكن أبدا في حالته".
