أحمد موسى يعلق على بيان وزارة الرياضة: "تأخر 9 سنوات"
أكد الإعلامي أحمد موسى أن بيان وزارة الشباب والرياضة الذي صدر اليوم يعد في غاية الأهمية مشيرا إلى أن كل الأمور يجب أن تسير بانضباط.
وقال موسى خلال برنامج "على مسؤوليتي" المذاع على قناة "صدى البلد": "قلتها قبل كدة وبكررها؛ كل شيء لازم يمشي زي السافة في البلد؛ ومفيش حاجة اسمها حد فوق قانون البلد والجميع يحترم إجراءات الدولة وقوانين تنظيم الهيئات الرياضية".
وأضاف: "البيان للكل؛ لا لشخص أو جهة؛ الجماهير عليها الالتزام تماما لأن البيان يقول للجمهور والمسؤولين والهيئات الرياضية محدش ليه علاقة بنادي أخر محدش ليه علاقة بحكم أو رئيس نادي أو مدير نادي أو مسؤول في نادي كل واحد بيدافع عن فريقه ويساند فريقه".
وتابع: "بيان وزارة الرياضة حاطط مواد فيها حبس وخاصة بالخوض في الأعراض وسمعة العائلات والسب والقذف والاهانة والتعرض للحياة الشخصية وكل هذه المواد يمكن تكون بتعملها ومتعرفش فبلاش تعملها لأنهم هيطبقوا القانون بمعني الكلمة".
وأكمل: "وزارة الشباب والرياضة بتقولنا سيتم ضبط منظومة الرياضة للكل؛ لو أنا رايح النهاردة أشجع أي مباراة طلائع الجيش وفيوتشر؛ أنا أشجع الفريق بتاعي ومليش علاقة بحكم أو مدرب أو رئيس نادي ليا علاقة بفريقي فقط زي ما بنشوف في كل دوريات العالم؛ البلد قولا واحدا تاخد الإجراءات القانونية وتطبق على الكافة ومفيش حد فوق القانون".
وأوضح: "البيان دة متأخر 9 سنوات كان الكلام دة يبقي من 2014؛ كل حاجة في البلد ماشية زي الساعة ماعدا بعض الخلل في الملف دة؛ الملف دة خلاص مفيش سماح لأي برامج تلفزيون أو مقروء أو مسموع أو صفحات كل دة خلاص وكل دة ملوش علاقة بحرية الرأي والتعبير".
واختتم: "النهاردة الحساب ودا بيان يصدر عن وزارة الشباب والرياضة كممثلة للدولة والحكومة وحين يحدث أي تجاوز مينفعش الوزارة تتغاضى عنه والوزارة قالت اللي هيرتكب أي جريمة داخل أو خارج المنظومة الرياضية سيعاقب؛ عايزين الجمهور يرجع زي ما هيكون ماتش يوم السبت زي النهاردة النادي الأهلي أمام الهلال السوداني؛ حان وقت ضبط منظومة الرياضة".
