رانيا يوسف: بحب ربنا لكن مش بخاف منه.. والناس دائما فهماني غلط

أكدت الفنانة رانيا يوسف؛ أنها لم تلجأ في أي وقت إلى الدجالين؛ نافية ما تردد عن الاستعانة بدجالين لمواجهة الأعمال السفلية أو القيام بها.

وقالت يوسف في مقابلة مع برنامج "العرافة" المذاع على قناة "النهار": "أنا مبأمنش بالحاجات دي خالص؛ مفيش حد هيضرك طول ما ربنا مش عايز؛ أنا بحب ربنا لكن مش بخاف منه؛ أخاف منه ليه أنا مبعملش حاجة غلط".

وأضافت: "أنا بني آدمة بغلط وأرجع وأروح واجي؛ أنا بحب ربنا وبرجعله عشان بحبه؛ ليه دايما عايشين طول الوقت بقصة الخوف أنتي لما بتحبي حد عمرك ما هتزعليه؛ أخاف منه ليه أنا بحبه وبعمل اللي بيقولي عليه".

وتابعت: "أخاف من الموت ليه؛ ولا يفرق معايا بالعكس راحة من المسؤولية معنديش مشاكل؛ ومش بخاف من يوم الحساب وعندي ثقة مطلقة؛ وأنا غلطت في موضوع الفستان وكان سوء تقدير مني غلطت ورجعت".

وعن ارتداء ابنتها لنفس الفستان قالت يوسف: "أنا مبخليش حد يلبس أي حاجة أو يعمل حاجة؛ دي طفلة وكان عندها ساعتها 16 سنة".

وأوضحت: "موضوع الجواز مرفوض عندي والموضوع دة انتهي بالنسبالي وأنا عايشة مع بناتي وأبويا وأمي وأصحابي وكلابي وقططي".

ونفت يوسف ما تردد عن تهديدها بالقتل بعد رفضها الزواج من أحد الأشخاص مؤكدة أنها رفضت الزواج من هذا الشخص لأنها لم تشعر بالراحة.

وأكملت: "هو راجل كويس ولكن أنا مرتحتش؛ وكان في حاجات مريحتنيش أنا حياتي بسيطة ومليش في الشو غير في شغلي ولكن حياتي الشخصية مش للشو".

وأشارت يوسف إلى أن هناك كثير من الشائعات التي تتردد حولها موضحة أن هناك احدى السيدات دخلت معها في خلاف لأن زوجها السابق تقدم لخطبتها.

واختتمت: "واحدة جات تتخانق معايا أنا معرفش دي مين؛ قالتلي متقدملك طيب ما يتقدم أنا مالي ما تتخانق معاه هو؛ واحد متقدم طليقته تتخانق معايا ليه ما تروح تمسك في خناقه هو؛ هو أنا وافقت ولا في قصة حب هي ماشية وراه وبتراقبه وعايزة ترجعله أنا مالي ما تروح هي تتخانق مع طليقها".