"رسالة قوية".. ياسر جلال: الفن مش حرام والفنان لازم يكون مقدر أكتر من كده

تحدث النجم الكبير ياسر جلال، عن مسلسله الجديد "علاقة مشروعة" والذي من المقرر عرضه ضمن خريطة رمضان 2023.

وأعرب ياسر جلال في حوار مع برنامج مساء DMC، الذي يقدمه المذيع رامي رضوان على قناة DMC، عن فخره بانتمائه للوسط الفني.

وقال جلال: إحنا كفنانين على عكس ما الناس بتشوفنا يمكن زميل أو زميلة مش هقول يُظلم ولكن يتفهم غلط، أثناء تواجده في مكان في حفلة او مهرجان ويجده الجمهور يظهر بمظهر شيك ويتصور بشكل كويس، لأن ده ممكن يجيب لك شغل، رغم إن انا مش بروح مهرجانات لاني انطوائي شوية.

وأضاف: المجتمع لازم يحتوي فنانينه، فعلا شغلنتنا متعبة مش بنقصد نعمل حاجة غلط أو مش مظبوطة، لكن أنا ملاحظ ان بعض الزملاء بيتعرضوا لهجوم شديد.

ووجه جلال حديثه للجمهور: ممكن يكون الفنان تعثر، غلط، متدبحهوش قم بتقويمه، ويبقى فيه نقد بس بدون تجريح، مش لازم تدب فيه لحد ما تموته، انتقد وازعل بس مش بالضراوة دي، فين الحب والتسامح، أنا شايف إن الفنان لازم يكون مقدر أكتر من كده.

وحكى موقف جمعه برجل وصفه بالطيب كان يعاونه في بعض الأمور المتعلقة بتجديد بيته، وأثناء إحضار بعض المستلزمات التي سيحتاجها، كان هناك تكدس مروري، ووقتها استمعا لأغنية "في يوم وليلة" للفنانة الراحلة وردة الجزائرية، ووجد ياسر الرجل يعلق: إيه ده يا أستاذ بيقولوا الفن حرام ده لولا أغنية زي دي في الزحمة دي كان الواحد انتحر.

وقال جلال: الفن مش حرام، هو رسالة قوية جدا صحيح ممكن يبقى فيه حاجة زيادة شوية، ننبه الفنان فياخد باله، والنقد اتعمل ليه عشان يقول للفنان انت هنا أسرفت.

ياسر جلال يشارك في دراما رمضان 2023 بمسلسل علاقة مشروعة تأليف سماح الحريري، إخراج خالد مرعي، ويشارك في البطولة: داليا مصطفى، مي عمر.