إبراهيم عيسى: المواطن المصري بطل حقيقي في ظل الظروف الاقتصادية الحالية
أشاد الإعلامي إبراهيم عيسى بالمواطن المصري، مشيرا إلى أنه يعد بطل في ظل الظروف الاقتصادية الحالية وأنه قادر على توفير الحد الأدنى من احتياجاته رغم المصاعب.
وقال عيسى خلال برنامج "حديث القاهرة" المذاع على قناة "القاهرة والناس": "المواطن المصري بطل الحياة اليومية العادية؛ ولي الأمر أو ليه الأمر أو كلاهما معا؛ الاتنين أبطال بمعني حقيقي؛ الأب اللي بيروح مواصلتين لشغله ويرجع من الشغل وبعدين ينزل على شغلانة تانية".
وأضاف: "شقي كامل؛ المواطن المصري اللي بيحافظ على الحد الأدنى من كفاف يوميه وعيشه اللي بيحاول يحفظ للولاد والبنات القدر الكافي من الحياة الكريمة؛ الاب والام اللي بيكافئوا عشان يقدروا يحافظوا عشان مينقلوش الولد والا البنت من المدرسة الخاصة إلى تجريبية أو من تجريبية إلى عادية دول أبطال؛ مش أبطال حربيين ولكن لابد أن نعيد مفهوم البطل".
وتابع: "البطل مش البطل العسكري او السياسي أو في مواجهة الإرهاب؛ كل دول أبطال ولكن البطل الحقيقي في ظل هذه الأزمة هو المواطن اللي قادر ينفق على عيلته وبيته؛ المواطن المصري الان هو البطل اليومي أنه قادر يحافظ على الحياة العادية".
وواصل: "الحياة اليومية العادية الان أن تمضي في حياتك العادية دي بطولة؛ أنك تحافظ على صحتك النفسية والعصبية في ظل كل هذه الضغوط والمصاعب الأن دي بطولة وبطولة مطلقة".
وأكمل: "البطل الحقيقي للحياة الأن في مصر هو المواطن العادي؛ أحنا المواطن العادي هو بطلنا الحقيقي لأنه مش مدعوم بأي حاجة ومش مسنود بأي حاجة غير شقاه وعمله".
وأوضح: "المواطن البطل دة محتاج يعرف أنه بطل ويتصرف على أساس أن اللي بيعمله دة بطولة مش حاجة عادية؛ أن ولادك بيخدوا الدروس الخصوصية دي وأنت بتصرف عليهم في الازمة دي أنك بتعرف توفر على الأقل في الأسبوع لحمة دي بطولة حقيقة".
وذكر: "أنت معيار النجاح ورضاك أنت كمواطن الهدف الحقيقي لأي مجتمع ولأي دولة وعشان كدة المواطن الشقيان دة في ظل أزمة زي دي طاحنة ومؤثرة للغاية بيحصل رغبة أنه يفرج عن نفسه ولازم الضغط العصبي والنفسي والشقي بتاع كل يوم والقلق بتاع الرزق والمصاريف هتتوفر ازاي كل دة بيخلق توتره وقلقه وعصبيته وبيصنع الانسان المضغوط".
واختتم: "أنت انسان مضغوط وبطل عارف تتعامل مع الضغط دة ولكن الضغط دة بيبان في حاجات ويظهر في تصرفات دي بقي المشكل الحقيقي اللي بنقول عليها تصرفات الأزمة".
