تفاصيل إعلان طرح شركتي وطنية وصافي للاستثمار في البورصة

أكد الإعلامي أحمد موسى، أن الدولة أوفت بالتزاماتها التي أوضحتها في وقت سابق بطرح شركات تابعة للقوات المسلحة في البورصة.

وقال موسى خلال برنامج "على مسؤوليتي" المذاع على قناة "صدى البلد": "من سنتين أو أكتر الرئيس قال إحنا هنطرح بعض شركات القوات المسلحة في البورصة المصرية؛ وقتها طلع كلام كتير وقالوا ده مش هيتم ومن سنة الرئيس أتكلم بشكل واضح على الطروحات الخاصة بشركات القوات المسلحة وكان بيتكلم عن شركتين صافي ووطنية".

وأضاف: "قالوا الكلام دة مش هيحصل ولكن رئيس مصر لما بيقول حاجة بينفذها والنهاردة من ساعتين لقينا مجلس الوزراء عمل بيان؛ يوم الأربع الجاي هيتم طرح أول شركتين؛ صافي ووطنية وإجراءات الطرح هتكون من خلال مستشار الطرح وهيتم التواصل مع المستثمرين وبمنتهي الشفافية ومفيش حاجة مستخبية".

وتابع: "لما بتعمل كدة معناه ايه؟ معناه أن أنت دخلت في هذا الملف وبتنشط الاقتصاد وتنعش البورصة المصرية ولازم أحيي الحكومة المصرية؛ والحكومة مش هي اللي هتحدد النسب ولا ليها علاقة بالموضوع؛ المستشار المالي أو بنك الاستثمار هيتلقى العروض ويبدأ في الفحص؛ الحكومة لا تحدد نسبة ولا ليها علاقة بالموضوع".

وأوضح: "تم اختيار جهة متخصصة معنية هذا الأمر؛ شركة وطنية مثلا أسم بقي براند وليها أكثر من 250 محطة في مختلف المحافظات؛ ناجحة جدا وصافي معروفة بتاعة الماية أنت بتكلم عن شركتين كبار وناجحتين في السوق المصري؛ قبل كدة كان بيقلك الجيش مسيطر؛ القوات المسلحة كل شركاتها تدفع كامل الضرائب وهناك متابعة ومراقبة من الجهاز المركز للمحاسبات زيها زي أي شركة

وأكمل: "الدولة لما بتقول حاجة بتعملها ومعندهاش حاجة تخبيها في أي شيء؛ الدولة بتكشف كل ما لديها وبتكلم عنه بالأرقام والفلوس؛ الرئيس سأل على الهوا عن الضرائب اللي بتدفعها القوات المسلحة؛ الجيش المصري جيشنا وجيش كل مواطن وكل بيت".

واختتم: "كانوا بيقولوا من سنتين مفيش حاجة هتحصل ولا الطروحات هتحصل طيب أهي حصلت ويوم الأربع هيتم الإعلان ودا رسالة مهمة أنت بدأت إجراءات فعلية هيكون ليها تأثير على الاقتصاد المصري والبورصة؛ هيكون في تنشيط كبير للبورصة والاقتصاد وأنت محتاج تدخل وتعمل الطروحات النهاردة".