عمرو أديب عن خسارة الأهلي أمام صن داونز: "الفرقة عايزة فرقة"
علق الإعلامي عمرو أديب؛ على خسارة الأهلي أمام ماميلودي صن داونز الجنوب أفريقي بخمسة أهداف مقابل هدفين في المباراة التي أقيمت عصر اليوم ضمن منافسات بطولة دوري أبطال أفريقيا.
وقال أديب خلال برنامج "الحكاية" المذاع على قناة "أم بي سي مصر": "الاجوال اللي دخلت النهاردة تقول إن الأهلي محتاج يبني حيطة؛ والشناوي كان بيزعق ويقولهم حط رجلك يابني؛ الناس بتاعة صن داونز كانت بتلعب كل حاجة".
وأضاف: "أن تنزل هاشتاجات من النادي الأهلي تطالب برحيل محمود الخطيب أحنا في وضع لم نعتاده من قبل؛ الخطيب مسؤول الخطيب لازم يمشي هذا أمر مكانش جمهور النادي الأهلي بتعامل عليه أبدا أي نادي في مصر كان يمكن تطالب برحيل رئيسه إلا النادي الأهلي".
وتابع: "حط كل حاجة على جنب وقف وتأمل هاشتاجات أن الخطيب يرحل دا معناه أن جمهور النادي الأهلي قد وصلت الروح إلى الحلقوم والبلعوم أن الأهلي لا يقبل الخمسات والاربعات والتلاتات هذا الامر أصبح مستمر ومعظم اللي بيشجعوا الأهلي عارفين أن الفرقة عايزة فرقة".
وأكمل: "الأهلي كان شكله في الملعب سيئ هتقولي ما كل الفرق بتتغلب أنما هذا التدهور في المستوى وبص شوف الناس بتتكلم عن الخطيب ازاي؛ هذا الامر حاجة من اتنين يا جمهور الأهلي مش طايق نفسه خلاص ومستعد يهاجم إدارته والنهاردة بيتحدثوا عن صالح سليم ومانويل جوزيه مكان المدرب ومكان رئيس النادي".
وأوضح: "واصلين لهذه المرحلة وهذه مرحلة بائسة؛ ممكن يكونوا واصلين لهذه المرحلة اليائسة أو دي لجان بتتدخل في النادي الأهلي ويستغلوا أزمة النادي النهاردة مكانش في روح الفانلة الحمرا ولا الشورت الأبيض حتى".
وواصل: "جمهور الأهلي لأول مرة يتخلي عنه اليوم والنهاردة محمد صلاح ضيع بلنتي بشكل غريب فوقف الجمهور يهتف بمحمد صلاح انما النهاردة ما أراه على وسائل التواصل الاجتماعي لا يعبر عن النادي الأهلي اللي أنا أعرفه؛ في غضب لم نره من قبل".
واختتم: "بقالنا سنتين بنشوف الأهلي بيخسر الدوري ولم نرى أي هجوم على محمود الخطيب؛ هذه هي المرة الأولى التي يتم فيها الهجوم على محمود الخطيب وهذا أمر لازم أسجله بشكل اجتماعي".
