أول تعليق من أحمد موسى على خماسية صن داونز: يوم أسود في تاريخ الأهلي
علق الإعلامي أحمد موسى؛ على خسارة الأهلي أمام منافسه ماميلودي صن داونز الجنوب أفريقي بخمسة أهداف مقابل هدفين في المباراة التي أقيمت بينهما اليوم ضمن منافسات دور المجموعات ببطولة دوري أبطال أفريقيا.
وقال موسى خلال برنامج "على مسؤوليتي" المذاع على قناة "صدى البلد": "يوم حزين على جمهور النادي الأهلي؛ للمرة التانية والتالتة؛ كان الكابتن صالح سليم الله يرحمه في يوم الأيام كدة فقالك على جنب أقعدوا وهات الناشئين ليه؟ ربي اللاعبية.. اللاعيبة محتاجة إعادة لازم يحسوا أنهم بيلعبوا للنادي الأهلي واسم النادي الأهلي".
وأضاف: "معظم اللاعبين النهاردة لا يستحقوا أن يمثلوا النادي الأهلي من أول الشناوي؛ الشناوي أنا بقالي أكتر من شهر بقول الكلام دة مش دة الشناوي وكفاية على الشناوي؛ اللي عمله النهاردة كارثي ليس هذا حارس النادي الأهلي ولا منتخب مصر".
وتابع: "الشناوي بيبص على الكرة النهاردة زيه زي المتفرجين؛ 3 أهداف دخلوا في الشناوي لو أي حارس آخر ميدخلوش فيه؛ صن داونز شاط النهاردة 5 كور والخمسة دخلوا؛ الشناوي النهاردة ربنا مقدروش يصد كورة لا أرضية ولا فوق ولا تحت؛ الشناوي مش معانا؛ قاعد بيتفرج زينا زيه".
واردف: "يوم أسود في تاريخ النادي الأهلي.. ده مش النادي الأهلي اللي نعرفه.. لاعبو الأهلي هم الأسوأ في تاريخه".
وواصل: "إحنا بنتفرج وإحنا غضبانين والشناوي بيتفرج ولا كأنه عمل حاجة ليه؟ لأن مفيش حد بيحاسب الشناوي كابتن النادي الأهلي النهاردة مشفتش لاعب فيه نخوة الكرة؛ كابتن بيبو جمهور الأهلي النهاردة لا يستحق ما جرى؛ جمهور الأهلي عايز تغيير حقيقي جمهور الأهلي لازم يلاقي قرارات وإجراءات قبل الفريق ما يجي".
وأوضح: "جمهور الأهلي يستحق قرارات بحجم هذه الكارثة؛ هو أنا رايح وأنا عارف أن أنا هتغلب؟ قلنا المباريات دي في أقدام اللاعبية مفيش لاعيبة مفيش حد خايف على النادي الأهلي؛ دي لاعيبة رايحة تتغلب؛ الشناوي في المؤتمر الصحفي امبارح قالك الدنيا حر؛ هو أنت بتلعب في مصر فين يعني هو أنت قاعد في بولندا؟ أنت بتلعب في درجة حرارة 35؛ الشناوي بيتكلم امبارح بروح انهزامية".
واختتم: "أنت رايح عشان تغلب أو تتعادل على الأقل ترجع مغلوب خمسة؟ دخل هدف واتعادلنا قلنا يبدأوا فيجي التاني قلنا نقدر فيجي التالت نقدر فنجيب جول نرجع ناخد الرابع والخامس هو أنتوا فين هو فين اللاعيبة؟ من الماتشات القليلة اللي بقول يلا يا حكم حرام عليك يا حكم كتير أوي كدة يا حكم صفر يا حكم دا مش النادي الأهلي ولا فريق الأهلي ولا دول لاعيبة الأهلي".
