مصطفى بكري يهاجم مذيع الجزيرة: "باع وطنه ولسانه مقابل حفنة دولارات"
هاجم الإعلامي مصطفى بكري؛ مذيع قناة الجزيرة القطرية أحمد طه، مشيرا إلى أنه يسعى إلى دق “إسفين” في العلاقات المصرية – القطرية وتشويه سمعة البلاد.
وقال بكري خلال برنامج "حقائق واسرار" المذاع على قناة "صدى البلد": "لما يبقي في واحد بيبيع وطنه وقلمه ولسانه مقابل حفنة من الدولارات هنا أنت تقف أمام نموذج زي مذيع الجزيرة أحمد طه؛ اللي مفيش حلقة من حلقاته ألا ويقدم الزيف والكذب".
وأضاف: "شخص بدأ عمله في قناة الصحة والجمال ثم راح الجزيرة مباشر على اعتبار أنها بتدفع؛ واشتغل في التلفزيون التركي والإيراني وفتح على كله من البداية معروف اتجاهاته ومعروف دفاعه المستمر عن جماعة الاخوان وأعمالها الإرهابية".
وتابع: "ياما شمت في الشهداء وياما شمت في الوطن؛ كل برامجه للأسف كان تؤدي إلى نتيجة واحدة وهي كراهية شديدة لهذا الوطن عشان كدة محكمة جنايات أمن الدولة طوارئ قضت بالسجن المشدد عليه لمدة 15 سنة وشوفنا مين اللي بيدافع عنه نفس المشبوهين".
وواصل: "طلع من ساعات والا من أمبارح بحملة هجوم جديدة على مصر مستمرة؛ ادعاءات عن السجون؛ يكلمنا عن سجن بدر 3 وهو فيه كل المتطرفين وبتوع التكفير والذين تأمروا واللي قتلونا واللي اغتالوا الناس وقالك لا دا بعض الناس منعوا عنهم الدوا".
وأكمل: "احنا قدام سجون نموذجية سواء في بدر واحد أو وادي النطرون؛ مبقتش اسمها سجون بقت مراكز اصلاح وتأهيل ويقولك محاولات انتحار ويدعي على شخص معين أنه حاول الانتحار؛ كل اللي هناك من نفس الجماعات الإرهابية".
وأوضح: "لما يتكلم ويدعي ويسعى لاثارة الفتنة ونشر معلومات مغلوطة واكاذيب وزيف؛ ويقولها من قناة؛ أنت هنا بتشتغل لمصلحة جماعة بقصد افساد العلاقة المصرية مع قطر وهو دة الهدف منك أن كل ما بتشوفه مصر فتحت على بلد معين كان معاه أزمة تطلعوا بقي وتحطوا اسفين مش لمصلحة حد غير لمصلحة جماعة الاخوان".
واختتم: "هو دة اللي أنت بتعمله وبيعمله زملائك المنتشرين في لندن وتركيا؛ لا أنت ولا غيرك هتشوه سمعه هذا البلد؛ البلد دي كبيرة وشعبها أصيل ويستطيع الفرز بين الغث والثمين؛ احنا عارفينكم كلكم".
