بعد ضبط جزار الدقهلية.. تامر أمين: "ليه مبناكلش لحوم الأحصنة والحمير؟"

علق الإعلامي تامر أمين؛ على ضبط جزار باكستاني في محافظة الدقهلية خلال قيامه ببيع لحوم الأحصنة للمواطنين من أجل الاستهلاك الأدمي.

وقال أمين خلال برنامج "أخر النهار" المذاع على قناة "النهار": "اتنشر من يومين خبر أنه تم القبض على أحد الأشخاص في محافظة الدقهلية؛ جزار باكستاني ولما اتقبض عليه اتضح أنه بيبيع لحم أحصنة وهو أعترف بكدة وقال ياجماعة دي لحم أحصنة".

وأضاف: "الراجل قالهم دي حلال ومش ببيع حاجة حرام؛ وردوا عليه وقالوله قانوني والا مش قانوني؛ جريمة والا مش جريمة مصرح بيه والا مش مصرح بيه؛ الحلال والحرام دي قصة تانية مش بتاعتنا؛ هما جايين يقولوله أنت مصرح ليك تبيع لحوم الأغنام والماعز والبقر والجاموس ولكن الحمير والأحصنة مش مصرح ببيعهم في مصر".

وتابع: "الراجل ماسك على كلمة حلال ومش حرام وقالهم أنا لو بعت لحوم البقر محدش هيشتري؛ وهو كان بيبيع كيلو لحم الاحصنة بـ 160 جنيه وأنا مش عارف هو ازاي عامل الكيلو بـ 160 جنيه أنا معلوماتي أن الحصان غالي؛ معلوماتي أن الحمار من 12-15 ألف جنيه النهاردة والحصان كمان غالي بأرقام كبيرة أزاي لحم الحصان بيبيع الكيلو بـ 160 جنيه".

وواصل: "لكن أنا بردو مش قصتي هو كان بيبيع بـ 160 أزاي وهو بيقولهم في الفيديو والله العظيم أنا بخسر لكن بردو مش قصتي؛ قصتي هو أحنا ليه مبناكلش لحم أحصنة ولحم حمير؛ خلونا في الكلام العلمي الأول وبعدين نشوف؛ لحم الحصنة والحمير بيباع ويؤكل في دول كتير في العالم".

وأكمل: "لحم الخيل من الأطباق الغالية جدا في باريس؛ أنا لما كنت في باريس من كام سنة في أحد أشهر المطاعم هناك اكتشفت أن أعلى طبق هو لحم الخيل ولما سألت أنتوا أزاي بتاكلوا الخيل؛ قالولي دا صحي جدا".

واختتم: "مفيش حاجة في شرعنا الديني يمنع لحم الأحصنة ولا الحمير أنا مش عايز أفتي؛ من الناحية العلمية والغذائية هل لحوم الأحصنة والحمير أمنة؟ عشان الناس اللي بتبقي خايفة ويقولك أنا أكلت امبارح سندوتشات سجق وكبدة وبيتهيقلي أنها لحم حمير ممكن أموت أو اتسمم فأنا بطمنه وأقوله متقلقش أوي".