إبراهيم عيسى: إجابات كافة الأسئلة الاقتصادية موجودة في طبق الكشري
أكد الإعلامي إبراهيم عيسى أن الدولة والشعب توافقا على اختيار الاهتمام بالاقتصاد كمقدمة أولى مشيرا إلى أن توفير الغذاء أصبح الهدف الأساسي للجميع منذ عام 1952 وحتى الأن وأن الحديث عن المجالات الأخرى أصبحت أقل أهمية.
وقال عيسى برنامج "حديث القاهرة" المذاع على قناة "القاهرة والناس": " أنا اللي يهمني طبق الكشري وهذا ليس هزلا دا كلام حقيقي؛ مش طول الوقت الناس بتقول عايزين نأكل عيش مش طول الوقت الدولة والحكومة بتتكلم أنها عايزة توفر طول الوقت لقمة العيش؟ والعيش ولقمة العيش والاقتصاد أهم من السياسة والحرية والديموقراطية وبلاش شغل مثقفين ووجع دماغ".
وأضاف: "أي حد بيجي يتكلم عن تجديد الخطاب الديني أو تجديد دماء الحياة السياسية كل اللي بيتكلم بيترد عليه بايه؟ عايزين ناكل عيش نأكلهم منين؟ نصرف عليهم ازاي؟ الدولة اللي بتتصرف طول الوقت كولي أمر أو والد؛ السلطة الأبوية اللي عايزة توفر للعيال رزقهم وأكل عيشهم".
وتابع: "الدولة اختارت المعيار هو لقمة العيش؛ اختار المعيار هو الاقتصاد يبقي نتحاسب بالاقتصاد؛ دا اختيار الدولة مش اختيار حد تاني؛ اختيار المواطن وكل اللي شايفة وكل اللي يشغله لقمة العيش ودا رأيك أنت المواطن والمواطن هو السيد".
وأكمل: "يوم ما خلينا المواطن ترس في الدولة وأن المصلحة العامة أهم من مصلحة المواطن لا عرفنا ناخد مصلحة عامة ولا جبنا مصلحة المواطن؛ مصلحة المواطن أولا وأخيرا وهي اللي بتودي لمصلحة الوطن مش صح أن مصلحة الوطن هي اللي بتؤدي لمصلحة المواطن".
وأوضح: "الدول اللي قالت مصلحة المواطن والفرد عندي أهم حاجة هي اللي عملت مصلحة الوطن الحقيقة؛ بنلف وندور عشان المعيار يبقي ايه؟ المعيار طبق الكشري؛ لو المعيار طبق الكشري يبقي هو المعيار اللي اختارته الحكومة والشعب من 1952 ولغاية النهاردة".
واختتم: "توجهنا الاقتصادي؛ الدولة تمتلك والا تدير؟ أجهزة الدولة يبقي ليها اقتصادها والا تبعد خالص عن المشهد وتنظم وتدير؟ الأسئلة دي بتتجاوب في طبق الكشري؛ انا اقتصاد حر والا اشتراكي والاسئلة دي بتترجم في الاخر في طبق الكشري ويبدو أنه معيار مهم".
