عمرو أديب يجري اختبارات "طهي الدواجن البرازيلية" على الهواء
طالب الإعلامي عمرو أديب، الحكومة بالاستمرار في ضخ الدواجن البرازيلية المستوردة إلى حين استقرار السوق وتراجع أسعار الدواجن المحلية.
وقال أديب برنامج "الحكاية" المذاع على قناة "أم بي سي مصر": "أنا مبديش دماغي لحد؛ حكاية أن أسعار الفراخ نزلت على راسي أنا أهيب بالحكومة لا تثقوا في السوق ولا التجار خلوا الفراج المجمدة في السوق لغاية ما الفرخة المصري تبقى زي الفرخة البرازيلي".
وأضاف: "هما دلوقت بيقولوا الأزمة خلصت وقبل الفراخ دي ما تيجي كانوا بيقولوا قدامنا 8 شهور على ما الفراخ تبيض والكتكوت يطلع؛ الأسعار تنزل خلو الدنيا ماشية وخلو الناس تحصل على الدواجن".
وتابع: "كمية الإشعاعات اللي طلعت على الفراخ البرازيلي أكتر من أي حاجة في مصر؛ منها أن الفراخ البرازيلي ملهاش شوربة وأنها متنفعش في الملوخية ومبتتاكلش ومبتتمضغش".
وتابع: "أنا برد على الكلام ده النهاردة وبوريك أن الفراخ دي بتتاكل وبتطلع شوربة وبتغني وتمثل وتعمل كل حاجة وأنا سعيد أن المواطن راح جاب فرخة وبدأ ينبسط؛ أنا لا هاممني قيمة غذائية ولا بتاع أنا يهمني العيال تنبسط والفراخ تبقى موجودة؛ أنا لا بتاجر في الفراخ ولا بكسب منها حاجة أحنا جيل كلنا فراخ مجمدة أحنا جيل الجمعية".
وواصل: "إنما لازم الفرخة البلدي بتاعة الفيوم؛ احنا يا دكاترة في أزمة؛ وجبنا خبير النهاردة عشان يعمل فراخ؛ الدولة استوردت 100 ألف طن دواجن عارفين يعني كام فرخة؟ لو المصريين خدوا الفرخة معاهم في البيت ولقوا أنها مش عاملة معاهم واجب مكانوش هيسكتوا المصريين مبيسكتوش في الأكل".
وأوضح: "النهاردة هنعمل فراخ برازيلي والنهاردة هنجري عليها كل الاختبارات بتتسلق وتتحمر وتتشوي ويتعمل عليها كل حاجة".
واستضاف الإعلامي عمرو أديب خلال البرنامج الشيف طارق إبراهيم، الذي بدأ في إعداد الدواجن البرازيلي التي قام فريق الإعداد بالبرنامج بشرائها من الأسواق.
وكانت شائعات كثيرة قد انتشرت على وسائل التواصل الاجتماعي فور إعلان الحكومة نيتها استيراد كميات من الدواجن البرازيلي من أجل سد الفجوة الموجودة في السوق.
وتدرجت الشائعات حول الدواجن البرازيلية ما بين التشكيك في صلاحيتها للاستهلاك الأدمي إلى اتهام الحكومة باستيرادها من أجل تحقيق أرباح.
