بعد حبس مرتضى منصور.. عمرو أديب يطالب بتنقية الجمعية العمومية بنادي الزمالك
طالب الإعلامي عمرو أديب مؤسسات الدولة بالقيام بدورها تجاه نادي الزمالك، وذلك بعد الحكم النهائي بحبس مرتضى منصور رئيس النادي في قضية سب محمود الخطيب رئيس النادي الأهلي.
وقال أديب خلال برنامج "الحكاية" المذاع على قناة "أم بي سي مصر": “نادي الزمالك مش في أعظم حالاته يعني؛ مكانش أعظم شيء في عهد مرتضى منصور يعني؛ أنتوا بتشجعوا الزمالك ولا بتشجعوا مرتضى منصور".
وأضاف: "النهاردة جايين يدورا في مجلس الإدارة على حد؛ هي كانت محكومة بيه هو وعياله؛ هو حلو لكل المصريين أن العدالة على رقبة الجميع؛ أمتى تبتدي تتوجس خيفه؟ أن مرتضى منصور يطلع من السجن على نادي الزمالك؛ ودي بقي هتبقى موائمات ويقولك أصل النادي أصل مفيش حد ينفع".
وتابع: "البلد كانت بتنام كل يوم باليل على حد كان بيسب البلد كلها؛ الناس كان دايما عندها علامة استفهام علامة الاستفهام النهاردة انتهت".
وذكر: "ابتدي يبقي في تفسيرات عشان تفضل علامة الاستفهام مستمرة انما حقيقة الأمر أنه تم ترحيل مرتضى منصور إلى سجن وادي النطرون".
وأوضح: "المطلوب أن تقوم مؤسسات الدولة بدورها؛ النادي متهالك وفي حالة سيئة جدا وأن الأوان أن الدولة تقوم بدورها وزي ما بقول لحضراتكم هناك يأس عام ويأس خاص له علاقة بنادي الزمالك؛ النهاردة أتفرج على الماتش أفريقيا براها وخرجنا من الكأس وراح الدوري والسوبر".
وواصل: "يا جماعة نقوا الجمعية العمومية هو دخل فيها ناس كتيرة كانت تبعه وبتنجحه؛ أنا حضرت سجن مرتضى منصور كذا مرة وخلافاتنا موجودة أنا معنديش معاه مشكلة يارب يخرج بعد بكرة بس الناس تفهم أن في قانون بيطبق".
وأكمل: "لو كملنا كدة هتفضل علامة الاستفهام موجودة هو ابتدأ يسيء إلى ناس موجودة وهو ابتدأ يقول أنا فلان أعرفه وفلان أعرفه وطبعا دول مش هيطلعوا كل شوية يقولوا احنا منعرفوش؛ لازم نعود مرة اخري للشيء الطبيعي أن في نادي وعنده ألعاب زيه زي الـ 18 نادي أرجو أننا نعدي هذه المرحلة".
وكانت محكمة النقد قد قضت اليوم برفض النقض المقدم من مرتضى منصور رئيس مجلس إدارة الزمالك على حكم حبسه لمدة شهر في قضية سب محمود الخطيب رئيس النادي الأهلي.
وقامت الأجهزة الأمنية المصرية باصطحاب رئيس نادي الزمالك مرتضى منصور من مقر محكمة النقض وسط القاهرة لتنفيذ فترة الحبس المقضي بها ضده لمدة شهر.
