بعد إلغاء قرار التسعير.. أحمد موسى يوجه رسالة إلى حائزي الأرز

أكد الإعلامي أحمد موسى، أن إلغاء قرار تحديد سعر الأرز يجب أن يدفع التجار والمنتجين لطرح ما لديهم من كميات في السوق لأن الأسعار سوف تتحدد طبقا لألية العرض والطلب.

وقال موسى خلال برنامج "على مسؤوليتي" المذاع على قناة "صدى البلد": "في نوفمبر الماضي مجلس الوزراء اتخذ قرارا بشأن تحديد سعر الأرز وهذا القرار تم العمل به على مدار الشهور الماضية وكان أخرها امبارح.. النهاردة هذا القرار اتلغي يعني من النهاردة مافيش تحديد لسعر كيلو الأرز اللي كان محدد باعتبار الأرز سلعة استراتيجية".

وأضاف: "القرار لما اتعمل كان الهدف منه إنك توفر الرز للناس واللي عنده كميات رز يوفرهاويقوم بتوريده لوزارة التموين؛ مأداش اللي كنا كلنا نتمناه في ناس أخفت الرز وناس تانيين خد الرز ده أكلوه للمواشي فبقى عندنا مشكلة".

وتابع: "تتخيل مصر؛ أحنا إنتاجنا بيزيد عن استهلاكنا بحوالي 400 ألف طن؛ الرقم ده سمعتوه من كل المسؤولين في البلد؛ لما نتكلم في ده ونشوف النهاردة فين ومش موجود والنهاردة هنستورد؛ في حاجة غامضة لكن هذا القرار قد يؤثر ودا اللي صدر وقتها".

وواصل: "هذا القرار ألغي وبالتالي تترك الأرز سلعة للعرض والطلب واللي عنده رز ينزله في السوق لأن خلال بقي عرض وطلب؛ في ناس أحجموا أنهم يبيعوا وقالك هنخسر احنا اشترينا بالغالي ومقدرش أبيع بالسعر دة؛ النهاردة خلال بقي السعر حر للعرض والطلب".

وأوضح: "عندنا كميات كتيرة موجود متوفرة والناس اللي عندها في المخازن تخرجه؛ تبدأ الأسعار تنزل والكميات اللي هتجيلك من برة هتنزل الأسعار من 20-30 ألف طن وبمجرد ما تنزل السوق تنزل الأسعار كما تبقى الدنيا تظبط معانا خاصة أننا داخلين على رمضان والسلع متوفرة بكميات كبيرة جدا".

وأكمل: "السلع موجودة والاحتياطي موجود والدولة حريصة على ده وتوفر للناس واللي معاه بطاقة تموين حاجته كلها متوفرة وموجودة في بطاقات التموين".

وأصدر مجلس الوزراء قرار رقم 94 لسنة 2023 بأنه اعتبارا من يوم 15 فبراير 2023 يتم إنهاء العمل بقرار مجلس الوزراء بشأن تحديد سعر بيع الأرز الابيض لمدة 3أشهر أو لحين إشعار آخر.