أحمد موسى يعلق على خسارة الأهلي: "مسافرش من القاهرة"
علق الإعلامي أحمد موسى؛ على خسارة الأهلي أمام مضيفه الهلال السوداني بهدف دون رد في المباراة التي أقيمت بين الفريقين اليوم في إطار الجولة الأولى من بطولة دوري أبطال أفريقيا.
وقال موسى خلال برنامج "على مسؤوليتي" المذاع على قناة "صدى البلد": "امبارح والنهاردة؛ امبارح الزمالك بيلعب قدام المريخ السوداني والأهلي أمام الهلال السوداني؛ الزمالك اتعادل والأهلي اتغلب؛ والنهاردة هزيمة الأهلي بخطأ كارثي من محمد الشناوي".
وأضاف: "الشناوي معرفش الكرة دي دخلت ازاي أو خدعته ازاي وشافها والا مشفهاش؛ مينفعش جول زي دة يدخل في الشناوي أو أي حارس مرمى؛ لو حارس مرمى بيلعب درجة تالتة الكرة دي متدخلش؛ كرة سهلة جدا أي حارس مرمى يطلعها".
وتابع: "عندنا أخطاء كارثية؛ أما تيجي تشوف النادي الأهلي النهاردة الفريق كله على بعضه فيه اتنين بيلعبوا هتلاقي عبد القادر وعبد المنعم والباقي مش موجودين؛ الشناوي واقف في مكانه زي ما نقول كدة الشناوي في حته تانية؛ أنا اكتشفت الشناوي في حته تانية؛ الكرة في حته والشناوي واقف مكانه رايح يجيب الكرة من الشبكة".
وأكمل: "الشناوي أتكلمنا عنه في مباراة تحديد المركز الرابع بكأس العالم للأندية؛ وقلنا أيضا الخطأ الكارثي اللي حصل الشناوي كدة بيضيع مجهود إدارة ولاعيبة وبتزعل الجمهور؛ الأهلي النهاردة تقدر تقول عليه مسافرش من القاهرة هو الأهلي فين الشوط الأول والتاني؛ حسين الشحات كان ممكن يخلص الماتش في أول ست دقائق".
وأوضح: "ضيع الشحات زي ما ضيع قبل كدة؛ ست دقائق تركب الماتش من أوله وتستحوذ على الكرة ولكن ضيع الكرة فرصة مؤكدة تدخل جول؛ المدرب كولر النهاردة بنتكلم عن التغييرات والأخطاء والتغيير والجمهور النهاردة غضب وليه حق يزعل وشاف الأهلي النهاردة بيلعب بدون روح".
واختتم: "اللي شفناه النهاردة لا دوري أبطال أفريقيا ولا درجة تانية أفريقيا ولا أي شيء ملوش علاقة بكرة القدم؛ اللي اتفرجنا عليه النهاردة وامبارح؛ أنا اتفرجت على ماتشات أشقائنا في ناس لأخر وقت عايزين يلعبوا كرة؛ صن داونز امبارح فايز تلاتة وصن داونز بيلعب كرة وبيقول عايز أفوز وأكون في صدارة المجموعة".
