مصطفى بكري يطالب بمحاكمة المتلاعبين في الأسعار عسكريا: "الناس هتتجنن"

طالب الإعلامي مصطفى بكري؛ بمحاكمة المتلاعبين في الأسعار عسكريا مشيرا إلى أن هناك انفلات غير طبيعي في أسعار السلع المختلفة.

وقال بكري خلال برنامج "حقائق وأسرار" المذاع على قناة "صدى البلد": "الأسعار بقت نار وأنا بتوجه بهذا النداء للسيد رئيس الجمهورية؛ أحنا عايزين أي حد بيغلي الأسعار يتحاكم؛ لو اتحاكم محاكمة عسكرية ماحد هيقول لا؛ مش معقول كيلو اللحمة يوصل من 250 إلى 270 إلى 280 هو المواطن المصري أصبح فريسة لهؤلاء الجشعين اللي هما لاهم له ألا أنهم يربحو".

وأضاف: "الناس هتعمل ايه؟ الناس ماشية في الشارع هتتجنن أحنا محتاجين تدخل صارخ وصارم ونحول لمحاكمات عسكرية هو واحد بيمص دم الشعب المصري ما يتحول لمحاكمات عسكرية يهمني أمن المجتمع لأن الناس ضجت من الأسعار وكله بيعاني".

وتابع: "صحيح القيادة السياسية بتبذل جهدها ولكن على أرض الواقع في ناس بتفسد كل شيء ولا هم لهم ألا الربح كل واحد بيرفع الأسعار بطريقته وبيزود بطريقته؛ كيلو اللحمة كان 250 جنيه وداخل على 300 لازم نراضي الناس التعبانة الشقيانة".

وواصل: "الناس عايزة تأكل ولادها وتبقى مستورة في الدنيا؛ الناس قاتلت ودافعت عن مشروعها الوطني عشان تلاقي لقمة عيش كريمة؛ النهاردة الازمات تكالبت علينا من الخارج نعم ولكن بردو في الداخل في أيدي خبيثة كأنها تريد أن تحشد الناس في مواجهة هذا النظام الوطني".

وأكمل: "في ناس بتشتغل ضد البلد ولا عايزة قيادة وطنية تتحدي ولا عايزة جيش وطني قوي؛ احنا في ظرف تاريخي صعب لازم نحافظ على بلدنا وجزء من الحفاظ على بلدنا اللي ازاي نواجه هؤلاء الجشعين اللي بيدمروا احنا دولة بتعاني من مشاكل وتداعيات من برة تيجي علينا جوة".

وأوضح: "هل يعقل بلد عندها أزمة اقتصادية ومفيهاش وزارة اقتصاد وهل يعقل بلد عايزة استثمار ومش قادرة يبقي عندها وزارة استثمار؟ مرة نعملها هيئة ومرة نعملها وزارة؛ نعمل وزارة وتبقي معنية بضرب كل الروتين احنا بنسمع مشاكل من مستثمرين عرب والناس مصرة تبقى موجودة هنا".

واختتم: "احنا عملنا مؤتمر اقتصادي من كام يوم والسيد الرئيس قال لازم نزيل كل العوائق احنا بنفشل ليه في حاجات تافهة متساويش؟ أنا مش عايز غير بلدنا تبقى أمنة ومستقرة ولبلدي وللنظام اللي خلصنا من بلاوي كتيرة؛ لازم نسمع صوت العاقلين وتتخذ قرارات فورية".