إبراهيم عيسى: "الفكر والسياسة والوعي هما اللي هيحلوا أزمة الاقتصاد"
أكد الإعلامي إبراهيم عيسى؛ أن اهتمام الحكومة والشعب بالاقتصاد كأولوية أولى تسبب في تدور الوضع الاقتصادي طوال السنوات الماضية.
وقال عيسى خلال برنامج "حديث القاهرة" المذاع على قناة "القاهرة والناس": "واحدة من مشاكلنا الأساسية في المجتمع المصري أنه لا صوت يعلو فوق صوت الاقتصاد؛ من اللحظة الأولى الدولة المصرية معتقدة اعتقاد راسخ أنه لا صوت يعلو فوق صوت الاقتصاد؛ لا تزال الدولة المصرية تتصور أن الاقتصاد هو الأولوية الأولى وأن أي شيء أخر أولوية تالية".
وأضاف: "الأولوية هي الاقتصاد سبنا من الثقافة والتعليم والسياسة مش عايزين وجع قلب وخلينا نركز في أن الناس عايزة تاكل عيش وعايزين نأكل الناس عيش والناس نفسها لا صوت يعلو فوق صوت الاقتصاد من سنوات بمعني أنه خلينا ناكل عيش بلا غم بلا سياسة بلا قرف أحنا عايزين نأكل عيالنا وعايزين نشتغل".
وتابع: "دي الرؤية التي قامت عليها الدولة منذ سنة 1952 والدولة تظن أن المهمة الأساسية أن تأكل شعبها عيش والشعب غرضه الأساسي أنه ياكل عيش فملاقوش العيش هما الاتنين أو بصعوباته الشديدة اللي بتتفاقم والاهتمام الرهيب الشديد الهائل بالاقتصاد أدى لأزمة اقتصادية".
وواصل: "حد فكر بقي أن دي مشكلة في حد ذاتها طلع أن الاقتصاد مش هو كل حاجة مش اللي هيبني الدول ومش الأولوية الأولى؛ الخطأ بيتكرر من الطرفين الدولة والشعب والاعتقاد أن حل الاقتصاد بالاقتصاد والاعتقاد أن في أزمة اقتصادية هنحلها بقرارات اقتصادية وربنا هيحلها بإذن الله".
وأوضح: "الأزمة ودتنا إلى أنه نهتم فقط بالاقتصاد ونفكر بكل حاجة في الاقتصاد بكل نواحيه ودي حاجة مهمة جدا بس هو السؤال هل هو الحاجة الأهم والأساسية".
وأكمل: "مجربناش أن كل اللي بيحصل ده ودي إلى أن الاقتصاد لا أولا ولا حاجة وطلع أننا مش متفوقين في الاقتصاد وكل التجارب اللي مرت علينا تجارب الدولة الاشتراكية والدولة اللي بتحاول تبقى رأس مالية والدولة اللي بتدير كل شيء كل دة أدى إلى إيه؟".
وذكر: "المفروض أن ده يودينا أن الاقتصاد مش كل حاجة وأن في حاجة قبل الاقتصاد المفروض نعملها ومعملنهاش؛ مش عايزين نقتنع بده اطلاقا على المستويين لا الدولة ولا الشعب؛ امتي هناخد بالنا أن في حلقة مفقودة في مصر".
واختتم: "مصر التي تعتقد حكومة وشعبا أن الاقتصاد هو العمود الفقري وكل شيء وأن كل شيء أخر ثانوي ومش وقته ولما بقي في مشكلة في العيش محدش عايز يصدق أن في حاجة قبل الاقتصاد أنه ياجماعة الفهم والفكر والسياسة والتعليم والثقافة والوعي هما اللي هيحلوا الاقتصاد".
