تفاصيل الكشف عن مقبرة فرعونية مزيفة بهدف النصب على المواطنين

كشف الإعلامي أحمد موسى عن أحدث طرق النصب باستخدام الأثار، حيث أنشأ أحد النصابين مجسما لمقبرة فرعونية تضم تماثيل من الجير وتابوت من الفيبر.

وقال موسى خلال برنامج "على مسؤوليتي" المذاع على قناة "صدى البلد": "أغرب طرق النصب في الأثار تلاقي حد يقلك يا فلان عندك كذا في الحتة الفلانية؛ النهاردة تم الكشف عن طريقة فريدة في النصب وردت معلومات للجهات المعنية وتحركت لجنة للمجلس الأعلى للأثار أن في مقبرة في الحتة الفلانية في الجبل".

وأضاف: "راحوا فلقوا في مقبرة حد تعب نفسه وعمل طريق وقعد يشتغل سنتين تلاتة وحفر زي 15 متر وجاب شوية حاجات من خان الخليلي ورسم شوية حاجات على الحيطة وهم واحتيال وناس بتجري ورا الحاجات دي".

وتابع: "لو انت مش متخصص هيضحك عليك ليه تجري ورا الوهم؟ راحوا ولقوا تابوت وبيروجوا أنها دهب وقطع ذهبية وقالوا إن دي مقبرة وحاجة محصلتش؛ هذه أوهام وتزوير كله جبس".

من جهته كشف الدكتور مصطفى وزيري رئيس المجلس الأعلى للأثار تفاصيل المقبرة الأثرية المزورة والتي حاول البعض استغلالها من أجل النصب على المواطنين.

وأوضح وزيري في فيديو مصور من داخل المقبرة المزيفة: "النهاردة 13 فبراير 2023 من المكان اللي تم فيه البلاغ أن في أثار ومنطقة أثرية للأسف كلها نصباية حتى التابوت دة طلع من الفايبر وسبايك الدهب معمولة من الدهب والتماثيل من الجبس".

وأكمل: "نقدر نقول إن كل اللي موجود هنا نصباية كبيرة ومفيش حاجة أثرية على الإطلاق حتى النقوش الموجودة لا تمت للأصل في شيء سواء الخرطوش الفيك ومناظر الرسوم دي اتعملت حديثا ولا تمت للواقع بشيء كلها حاجات جايبها من كتب أو من دماغه".

واختتم: "حتى مظهر الملك اللي ماسك التعبان دة لم يظهر مظهر زي كدة في تاريخ الحضارة المصرية القديمة على الإطلاق دي نصيحة لكل الطماعين متعقوش فريسة في أيد النصابين لو سمحتوا أهي نصباية كبيرة أهيه".