عمرو أديب يعلق على خسارة الأهلي أمام فلامينجو
علق الإعلامي عمرو أديب؛ على خسارة الأهلي أمام فلامينجو البرازيلي في مباراة تحديد المركز الثالث والرابع ضمن منافسات بطولة العالم للأندية.
وقال أديب خلال برنامج "الحكاية" المذاع على قناة "أم بي سي مصر": "بنشكر الأهلي على أداء اللاعبين في كأس العالم للأندية اللاعيبة عملت اللي تقدر عليه؛ الأهلي هزم نفسه وبصراحة الفرقة دي مش برازيلي أوي؛ ليست فرقة قوية جدا والأهلي كان ممكن الأمور تبقى أحسن من كدة شوية".
وأضاف: "لازم أشكر اللاعيبة والمجهود اللي عملوه وكان نفسنا طبعا يخدوا الميدالية البرونزية والرابعة يا أهلي والحاجات الجميلة دي؛ الأخطاء كانت مرعبة البلنتي اللي ضاع والشناوي والكورة اللي ادوها لمهاجم فلامنيجو عشان يجيب الجول".
وتابع: "حسيت أن الماتش دة كان ممكن يعمل أحسن من كدة؛ ناس كتير بتسألني أنت مالك وما الأهلي هو ليه ياجماعة لما الزمالك يتكلموا مصر كلها بتكلم على الزمالك؛ احنا بنتفرج على الأهلي كممثل للكرة المصرية".
وواصل: "اللي اتعمل في ماتش ريال مدريد اتعمل النهاردة تاني؛ هو الراجل نزل حسين الشحات قبل نهاية الماتش بدقيقتين ليه؟ أنت مخلي المهاجم لأخر دقيقة؛ أنا عايز أعرف ايه الطريقة السويسري دي؟ بصراحة رغم أن معلول ضيع بلنتي لازم أقول يابخت الأهلي بمعلول لعيب محترم وإخلاص".
وأكمل: "ولازم اشيد بأحمد عبد القادر بشكل كبير؛ أنا لازم أقول إن المدرب مسؤول بنسبة 75% عن التشكيل اليوم أنت جايب لاعيب لسة منتقل ولعيبة غيرت مراكزهم؛ عايز أسأل سؤال اللي بيسأله كل جمهور الأهلي هو ليه الأهلي معندوش مهاجم؟".
وأوضح: "لو في مهاجم كويس كان يجيب اجوال؛ شريف ضيع وطاهر ضيع؛ لو في مهاجم ماسك نفسه في المرتدات دي كان جاب أربع خمس أجوال ومع كل هذا بنشكر الأهلي على المجهود والأداء وإن شاء الله يرجعوا يكملوا مسيرتهم في أفريقيا والدوري".
وذكر: "أنا عايز اسأل أي مواطن اهلاوي؛ أنتوا شايفين إن الأهلي أدي أداء مميز في هذه البطولة؟ شيل الماتشين اللي في الأول أنما هل الأهلي قدم أداء جيد في هذه البطولة؟ أيوة الأهلي عالمي بيلعب واحنا تعبانين واتغلبنا من فاركو؛ أنا بسأل الأهلوية أنتوا راضيين يعني؟ لو أنت راضي هسيبك لضميرك".
واختتم: "الأهلوية النهاردة نايمين في حالة صعبة وأخطاء حصلت في الملعب ضيعت الماتش كله وفلامنجو دة مش حاجة عظيمة يعني وشتان بينه وبين ريال مدريد؛ اظن أنها لن تكون ذكري طيبة يعني".
