أحمد موسى يعلق على خسارة الأهلي: شريف أهدر برونزية مونديال الأندية

علق الإعلامي أحمد موسى؛ على خسارة الأهلي أمام فريق فلامينجو البرازيلي بأربعة أهداف مقابل هدفين في مباراة تحديد المركز الثالث والرابع بكأس العالم للأندية.

وقال موسى خلال برنامج "على مسؤوليتي" المذاع على قناة "صدى البلد": "كان سهل جدا البرونزية الرابعة ولكن احنا ضيعناها بإيدينا؛ أول من تسبب في إضاعة البرونزية الرابعة محمد شريف؛ كان الجول التالت يخلص والنتيجة تبقي 3-1 وانتهت المباراة شريف ضيع كرة بسذاجة كبيرة جدا؛ انفراد ولو أنت مهاجم وتضيع هذه الكرة يبقي أنت لا تستحق اللعب في هذا المكان".

وأضاف: "لما بتعمل حاجة كويسة بنطلع بيكم السما ولما تعمل حاجة غلط لازم تلاقوا النقد من كل حتة؛ الجمهور والإعلام ماتش النهاردة كان في أيدينا فلامينجو مش الفريق الصعب أبدا؛ أحنا كنا متأخرين وتعادلنا وتقدمنا وعبد القادر ولا أروع أحسن لاعب في المباراة".

وتابع: "على معلول ضيع ضربة جزاء وشريف ضيع انفرد ويطرد من عندنا لاعب؛ خالد عبد الفتاح اطرد الدقيقة 67 وخلاص خلصت وأتعادلوا معانا وتقدموا وينزل ديانج ومحمد هاني؛ كولر النهاردة مش هو والاتنين اللي نزلهم تسببوا في الهدف التالت والرابع".

وواصل: "نزل هاني عمل ضربة جزاء ونزل ديانج ادي أسست زي اللي اداه للاعب ريال مدريد؛ معرفش هو ما بيبصش والا ايه؛ بيلعب الكرة ورا لمين؟ أنت في نص الملعب جنبك اتنين يمينك وتلاتة شمالك ليه بترجع الكرة للشناوي".

وأوضح: "المدير الفني النهاردة سبب الهزيمة والمباراة كانت تخلص قولا واحدا للنادي الأهلي؛ الشوط الأول مكناش موجودين ولكن أخر ربع ساعة من الشوط الأول الأهلي أبدع وسيطر على الماتش والشوط التاني حصل الطرد وضربة الجزاء".

وأكمل: "عبد القادر النهاردة كان بيراوغ في لعيبة البرازيل اللي هما مدرسة المراوغة؛ في رقبة شريف هذه المباراة وفي رقبة شريف ضياع البرونزية الرابعة لو كان سجل التالت كان خلص الماتش؛ كنا نتمنى أن دة يتم ولكن للأسف لاعبيتنا ضيعوا".

واختتم: "الشناوي مفيش تفاهم بينه وبين محمد عبد المنعم؛ أنت خرجت خروج غلط يدخل فينا الهدف التاني ليه؟ مفيش تفاهم مع اللي قدامك دانت كابتن الفريق والكرة دي مينفعش تروحلها ومتجبهاش أحنا عندنا مشكلة كبيرة النهاردة في التشكيل وقراءة المدرب للملعب سيئة جدا وتغيرات سيئة".