عمرو أديب يسخر من قرار الغرب توريد الدبابات إلى أوكرانيا
علق الإعلامي عمرو أديب؛ على قرار الدول الأوروبية ارسال الدبابات إلى أوكرانيا لمواجهة القوات الروسية التي تخوض قتالا على الأراضي الأوكرانية منذ فبراير الماضي.
وقال أديب خلال برنامج "الحكاية" المذاع على قناة "أم بي سي مصر": "الدول الأوروبية اللي باعته الدبابات طلعوا تصريح غريب جدا؛ قالوا على فكرة ياجماعة احنا قولنا للأوكران إن الدبابات دي متضربش روسيا يعني متضربش أراضي روسية عشان الروس ميزعلوش أوي".
وأضاف: "الضرب يبقي فين؟ في مناطق القتال؛ أنا جامد وخد الدبابة بس لو سمحت بلاش؛ الروس قاله تقصد أنهي أرض؟ احنا مختلفين على الأرض الروسية الأوكران كدة بيفكروا لما يجيوا يضربوا بالدبابة يضربوا في أي حته".
وأضاف: "الدبابة دي مداها أربعة كيلو ولازم الروس يبقوا عندك؛ عقده غير طبيعية والروس الموضوع بالنسبالهم أبسط من كدة بكتير؛ قاله هي الدبابة جاية أمتى؟ قاله بكرة قاله طيب خلاص هنضربها".
وتابع: "أول ما يجي هيروح جاي بالطيارات الميج والسوخوي ويروح ضارب وطبعا التانين معندهمش غطأ؛ أنا مش خبير عسكري ولكن لما تقري تلاقي الناس دي بتعمل حاجات غريبة جدا اللي كلها من شأنها إطالة الحرب؛ هذه الدبابات لن تحسم المعركة".
وأوضح: "احنا مبنتكلمش عن ستالين جراد ومعارك الدبابات والأبراج بتاعة الدبابات دخلت في بعض؛ لا الباشا وهو قاعد في دونستك أو زباروجيا وبيجيب كل حاجة".
وأكمل: "أوروبا تفتق ذهنها لحاجة تانية قالك عايزين الخطوة اللي جاية نبعت طيارات فالروس قالولهم؛ كل ما تبعت أسلحة أكتر هتضرب أكتر ولو ابتدا بقي يبقي في أسلحة داخلة وناس جاية كتير أحنا هنولع في كل حاجة؛ احنا بنتفرج عن حرب غير رشيدة".
وواصل: "بنتكلم عن حاجة هتقعد ست سبع شهور عشان الناس دي تتعلم الدبابة؛ ميدفيدف دة كان رئيس لروسيا قال هنخليها رماد".
وكانت الولايات المتحدة وألمانيا قد وافقت على منح أوكرانيا دبابات أبرامز الأمريكية وليوبارد الألمانية لمساعدة القوات الأوكرانية في مواجهة الهجوم الروسي.
وأعلنت عدة دول غربية موافقتها على توريد عدد من الدبابات الألمانية التي تمتلكها إلى أوكرانيا خلال الفترة المقبلة.
