"كلملي ميكالي".. محمد بركات يكشف كواليس رحيل الحضري عن المنتخب الأولمبي

كشف محمد بركات؛ عضو اتحاد الكرة؛ عن تفاصيل رحيل عصام الحضري؛ مدرب حراس مرمى المنتخب الأوليمبي لخوض تجربة جديدة مع المنتخب السوري.

وقال بركات خلال برنامج "الريمونتادا" المذاع على قناة "المحور": "النهاردة أعلن رحيل الكابتن عصام الحضري إلى المنتخب السوري عشان يكون مدرب حراس المنتخب السوري الأمل مع هيكتور كوبر ومحمود فايز؛ الاتحاد السوري أعلن عن انضمام الحضري للجهاز الفني للمنتخب السوري وبعديها نزل كابتن عصام الحضري بيان على صفحته".

وأضاف: "خلينا أتوقف عند حاجة قالها كابتن عصام في البيان بتاعه اللي هي بعد استئذان محمد بركات ومستر ميكالي؛ اللي حصل بالضبط كألاتي أمبارح كابتن عصام الحضري اتصل بكابتن خالد سرحان مترجم مستر ميكالي وقاله عايز أقعد مع مستر ميكالي عشان عايز أتكلم معاه".

وتابع: "اتفقوا أنهم هيقعدوا مع ميكالي في المكان اللي قاعد فيه الساعة 11 والناس وصلت في معادها ووصل كابتن عصام الحضري الساعة 11 وربع؛ والكابتن عصام الحضري أتكلم مع مستر ميكالي أن عنده عرضين وأنه عايز يخوض تجربة جديدة وأنه واخد قراره والدنيا بالنسباله أنه لازم يخوض التجربة".

وواصل: "مستر ميكالي سأله وقاله أنت بتكلم معايا هل أنت تكلمت مع المسؤولين أو مع محمد بركات كمشرف على المنتخب وقاله أنا جايلك عشان تكلم محمد بركات وتنقله رغبتي ودة موضوع غريب جدا؛ لأن العلاقة اللي بتجمعني بعصام الحضري مش جديدة دا من أيام ما كنا بنلعب في النادي الأهلي".

وأوضح: "أنا نمري كلها معاك ما ترفع سماعة التليفون وتقولي فيه كذا وكذا؛ الراجل ميكالي رد عليه وقاله لو شايف أن التجربة هتفيدك وتزود السي في بتاعك أنا معنديش مانع ولكن أنا هتكلم مع كابتن بركات وأشرح له الموضوع".

واختتم: "صحيت من النوم لقيت أستاذ خالد المترجم مكلمني قلتله ايه الموضوع قالي إن كابتن عصام قعد مع الراجل وقال إنه جايله عرض ومش حابب يكمل في المنتخب الأوليمبي وأن ميكالي عايز يقعد معاك عشان نتكلم وقالته خلاص مفيش مشكلة؛ واتفقنا نقعد بكرة ونتفاهم وقلتله هكلم محمود حرب المدير الإداري أشوف المعاد أمتى وفين وهبلغكم".