إبراهيم عيسى: "لو مبارك عزل حبيب العادلي مكنتش ثورة 25 يناير اكتملت"
أكد الإعلامي إبراهيم عيسى؛ أن عناد نظام الرئيس الراحل حسني مبارك تسبب في إسقاط نظامه، مشيرا إلى أن تظاهرات 25 يناير خرجت في البداية لتطالب برحيل حبيب العادلي وزير الداخلية.
وقال عيسى خلال برنامج "حديث القاهرة" المذاع على قناة "القاهرة والناس": "محدش يوم 25 يناير الصبح كان عارف اللي هيحصل ولا أي حد؛ حصل تفاعلات كثيرة أدت للي حصل؛ أنا كنت موجود يوم 25 يناير الساعة 2 الضهر في ميدان التحرير".
وأضاف: "25 يناير بدأت عايزة تمشي حبيب العادلي؛ لو كان مبارك الساعة 2 الضهر شاف المشهد ده ومشاه ماكنش كل ده حصل؛ لما خرج الملايين وطلع صفوت الشريف في المؤتمر الصحفي والبرامج تلون كلامها لو في حد في قيادة مصر وقتها لا يتمتع بالعناد والغرور واستجاب وحس أن الموج عالي وغير الحكومة مكانش جمعة الغضب هتحصل".
وتابع: "ولو جمعة الغضب حصلت ويقوم مقرر يومها باليل تغيير الحكومة وحل البرلمان كان بقي عامل مؤثر في تغيير مسار اللي حصل؛ أنتوا فاكرين لما الرئيس مبارك خطب خطبة 1 فبراير والميدان فضي ولولا الفعل الأحمق المجنون بتاع دخول الجمل والحمارين لميدان التحرير والناس حست أن في غدر وأن الكلام اللي اتقال دة مش كلام تراجع واعتزال وأن الرجل عايز ينتقم مننا فقامت الدنيا تاني أن المجموعة اللي تصورت أنها هتصل لحلول مع النظام صدمت بما جرى فزاد الغضب وزدا ميدان التحرير تلاحما".
وواصل: "مكانش حد باني أن الـ 18 يوم يحصل فيها ايه ولا الجن الأزرق؛ كلها تفاعلات ومش مسؤول عن نتايجها أساسا؛ الناس خرجت في 25 يناير يقولك عايزين حبيب العادلي يمشي؛ العناد والغرور والانعزال عن الواقع صمم على حبيب العادلي فدفع حكمه نفسه تمن تصميمه على حبيب العادلي".
وأوضح: "في المحصلة الإحساس بأن أنا لو ضحيت بحبيب العادلي بتنازل؛ هو دة اللي ضيع الدنيا بالنسبة لمبارك؛ نقطة مهمة للتاريخ يعني؛ كان في فالبيت الأبيض خطة نيسكون بالتجسس على الحزب الديموقراطي الأمريكي ودا أمر جلل ورهيب؛ مين اللي بلغ الصحفيين؛ شخصية سموها الحنجرة العميقة كان بيقولهم المستندات فين وانتهت الفضحية باستقالة نيكسون بعد سنين عرفنا أنه لاري فيلد واحد مسؤول في البيت الأبيض هو بتاع الحنجرة العميقة".
واختتم: "احنا في النظم العربية وفي مصر مفيش حنجرة عميقة مفيش حد داخل النظام خرج عليه أو كشف عيوب أو أخطاء؛ أحنا منعرفش القصر الجمهوري حصل فيه ايه من 25 يناير وخلال الـ18 يوم".
