عمرو أديب يعلق على حرق المصحف في السويد: "تظاهر جاهلي"
علق الإعلامي عمرو أديب على واقعة حرق المصحف الشريف خلال تظاهرة أمام السفارة التركية في السويد وهو الامر الذي أدانته كافة دول العالم الإسلامي.
وقال أديب خلال برنامج "الحكاية" المذاع على قناة "أم بي سي مصر": "عمري ما فهمت دة هي جريمة بشعة وغير أخلافية اللي بيعمل دة بيعمله ليه؟ اللي حصل في السويد وقيام واحد بحرق المصحف الراجل دة كل سنة بيحرق المصحف؛ السنادي حرق المصحف أمام السفارة التركية".
وأضاف: "أنتوا المفروض دول متقدمة والتسامح ايه العقلية القذرة دي الشيء اللي ملوش علاقة بالأخلاق ولا النخوة ولا الإنسانية وبعدين يقولك العلاقات بين المسلمين والغرب فيها توتر".
وتابع: "يطلع رئيس الوزراء يقول دة فعل غير جيد وغير طبيعي واحنا ضد هذا الأمر ولكن حرية التعبير؛ هي حرية التعبير دي مبتجيش غير في المصحف".
وواصل: "انا رحت قابلت الراجل اللي رسم الرسوم المسيئة للرسول ودخلت المؤسسة اللي عملت الرسومات والحاجات أية يا جماعة في اية؟ تجد خواء وخبل وتجد لا شيء وهما مش عارفين أنهم بيعملوا جريمة إنسانية".
وأوضح: "أنا افهم أن الناس تتظاهر ضد قضية معينة وعندهم مشاكل اقتصادية ورفض سياسي لموضوع؟ انما المصحف ربنا حاميه أحرق مليون مصحف المصحف محمي وربنا حافظ المصحف".
وأكمل: "أنت بتظهر بشكل جاهلي؛ أنت بتظهر بشكل غير انساني أنت المفروض سياسي أنت عندك موقف من المهاجرين أطلع قول أنا عندي موقف ودي بلدي؛ أنت عندك مشكلة انما أنت قد المصحف؟ لا والله أنت مش قد المصحف؛ مش انت حرقته لا والله ما قده".
وذكر: "حتى الأنسان اللي معندوش هذه المشاعر بشكل مستمر تلاقيه متمسك وغاضب وحاسس أن اسلامه حقيقي ومحترم؛ عمري ما فهمت دة على مدى سنين يعني شيء حقير ووقح؛ أنما مش غرب ومثل ومش مبادئ دا يمثل وضاعة وحقارة".
واختتم: "أنا رأيي أنه أكيد هناك شيء قانوني ممكن يتعمل؛ أحنا عندنا الكثير من المحاميين الدوليين في العالم العربي؛ عندنا ناس تقدر تكلم مع محاميين في السويد؛ وربك فوق أي حد هو المنتقم الجبار وهو اللي يجيب الحق كمان ان شاء الله".
