إبراهيم عيسى: "المصريين استجابوا للأزمة وبطلوا ياكلوا لحمة"

أكد الإعلامي إبراهيم عيسى أن الشعب المصري خفض من استهلاكه من الطعام تأثرا بالأزمة الاقتصادية التي ضربت البلاد خلال الفترة الماضية مشيرا إلى أن احصائيات مركز أبحاث الغذاء العالمي تؤكد ذلك.

وقال عيسى خلال برنامج "حديث القاهرة" المذاع على قناة "القاهرة والناس": "اللي لازم نفهمه ونعرفه أن فعلا الأزمة صعبة وقوية وثقيلة بدليل أن مركز أبحاث الغذاء العالمي مطلع تقريره من مارس وحتى الأن شوف حجم التأثير على استهلاك المصريين ازاي؟ هو بيتكلم عن استهلاك المصريين للحمة والسمك والفراخ والبيض واللبن".

وأضاف: "شوف حجم انخفاض الاستهلاك؛ حصل تراجع في استهلاك اللحمة بـ 85% وفي البيض 75% والدواجن 73% واللبن 60% والأسماك 61%".

وتابع: "مصر بطلت تاكل بنسبة 85% لحمة؛ ودا معناه حاجتين؛ أولا حجم الضغوط والتأثير القوي والعنيف والحاجة التانية درجة استجابة المصريين؛ الشعب المصري استجاب للأزمة لعدم قدرته أو بإرادته؛ معاهوش فمبيفكرش يستهلك أو معاه بس غير أولوياته عشان يفضل يحافظ على حياته".

وأوضح: "أنا مش قلقان غير من انخفاض استهلاك اللبن؛ هو شيء صعب لأنه ليه علاقة بالأطفال والبنية الغذائية والصحية؛ ولكن لما تبص على قدرة المصريين على الاستغناء عشان محدش يقول للشعب المصري وفر؛ الشعب المصري وفر فعلا".

وأكمل: "محدش يقول للشعب المصري أصل انت بتأكل أكتر من استهلاكك أصل شوف الأكل اللي بترميه؛ لا أنتوا بتكلموا مع الـ15% بتوع زايد والتجمع والجونة والساحل ولكن الـ85% من المصريين بطلوا وخفضوا ومبياكلوش أصلا لحمة".

أحنا جايبين من الخبرا اللي بيدققوا في الرقم والمعلومة وبيتابعوا الاحصائيات؛ الشعب المصري عمل اللي عليه سواء مضغوطا ومجبورا أو بإرادته عمل اللي عليه؛ استهلاكه من اللحمة قل 85% واستهلاكه من الأسماك 61% و73% من الدواجن أقل يعمل ايه أكتر من كدة".

واختتم: "وفي المحصلة عشان أشرحلك حجم الأزمة ورد فعل المصريين بعتمد على الاحصائيات اللي بتقول الشعب المصري عمل الواجب ولازم نتوقف عن محاولة تنغيص عيشة الناس ونقول أصل انتي بتستهلكي عيش أكتر لا الناس عارفة مصلحتها وعارفة حدود امكانياتها المادية وبقت المسائل واضحة للمصريين".