الباز يرد على منتقدي إنشاء الطرق والمحاور المروية: "أه هناكل طرق وكباري"

أكد الإعلامي محمد الباز؛ أن المحاور والطرق التي تقوم الدولة بإنشائها تساعد في حل مشكلات كثيرة، مشيرا إلى أنها تفتح شرايين جديدة وتيسر حياة المواطنين.

وقال الباز خلال برنامج "أخر النهار" المذاع على قناة "النهار": "النهاردة وكعادته الرئيس عبد الفتاح السيسي راح تفقد مشروعات الطرق والمحاور في محافظة الجيزة وتفقد محورين؛ محور الفريق كمال عامر وهو يربط دائري المنيب ودائري والوراق وتفقد أيضا محور أحمد عرابي وطوله 11 كم وعرضه 6 حارات مرورية".

وأضاف: "يقوم واحد داخل في النص كدة ويقولك الكلمة أو التعبير الشهير هو أحنا هناكل طرق وكباري؟ أنا جيت قلت أه هناكل طرق وكباري؛ مهو يا قليل العلم لما تيجي تبص للمحاور والطرق دي بتتعمل ليه تلاقي فيه كذا هدف؛ أول هدف التيسير على الناس؛ القاهرة زحمة جدا واما تعمل طرق وكباري وأنفاق بتفتح شرايين جديدة في جسم البلد وتيسر حياة الناس".

وتابع: "التيسير على الناس توفر الوقت والفلوس في الوقود؛ والهدف الأخر أن المحاور جزء من التنمية بشكل عام؛ اللي بيتعمل دة حلول لمشاكل عشان الناس؛ في ناس بتستفيد من دة أيوة ولكن بتلاقي الصوت الأعلى للي هو ملوش علاقة".

وأوضح: "ممكن تلاقي واحد من محافظة بورسعيد أو أسوان أو أسيوط ويجي يعلق على المحاور في الجيزة ويقولك هو أنا هستفيد ايه؟ أنت مش هتستفيد بشكل مباشر ولكن في مواطنين أخرين هيستفيدوا والمواطن اللي في الصعيد لما اتعملت المحاور على النيل؛ الكباري على النيل لما لقوا أن بين كل كوبري والتاني 100 كم وقالوا نضيق المسافات ونخلي المسافة بين كل كوبري والتاني 25كم عشان الناس تتحرك بسهولة".

وأكمل: "عملوا دراسة ولقوا أن في ولاد كتيرة جدا مبيتعلموش في الصعيد؛ اللي هي فكرة أنك تروح تعمل كوبري على النيل وكانت المسافة 100كم والناس كانت بتعدي بالمعديات".

واختتم: "في ولاد ساكنين في شرق النيل والمدرسة في غرب النيل وعشان المسافة بعيد جدا كان في ولاد كتير بيقعدوا ومبيعلموش؛ الحاجات دي بتحل مشاكل أنت يمكن تكون مش ملم بيها؛ الرئيس قال دي حلول مكلفة صحيح ولكن في النهاية هي لصالح الناس".