أحمد موسى ينتقد التحكيم المصري: كلاتينبرج لا يستحق ألف دولار
انتقد الإعلامي أحمد موسى؛ التحكيم المصري في ظل قيادة الإنجليزي مارك كلاتينبرج مشيرا إلى أنه لم يحقق أي تطوير في التحكيم المصري.
وقال موسى خلال برنامج "على مسؤوليتي" المذاع على قناة "صدى البلد": "كنت بشوف الشوط الأول للزمالك وبيراميدز؛ والشوط الأول الزمالك كان متقدم واحد صفر وبعدين اتعادلوا الشوط التاني واحد واحد ولعبوا ضربات جزاء وبيراميدز تفوق؛ نادي الزمالك بقاله كام ماتش مش هو الزمالك".
وأضاف: "في حاجة معرفهاش؛ النهاردة الزمالك كان بيهاجم أه ولكن بيراميدز رجع وبعد كدة ضربات الجزاء وفوز بيراميدز على نادي الزمالك وفي ماتش الأهلي وسموحة بكرة واللي هيفوز فيهم هيقابل بيراميدز".
وتابع: "دي البطولة بتاعه السنة اللي فاتت مش الكأس الجديد؛ أحنا عندنا أغرب الغرائب في الكورة وفي التحكيم؛ أغلب الفرق بتشتكي من التحكيم مفيش فريق مش بيشتكي؛ والتحكيم في مصر عليه تريليون علامة استفهام".
وواصل: "بعض الحاجات اللي بنشوفها تقول هو معقول كورة زي كدة المفترض الفار يشوفها ويراجعها؛ هل الفار بتاعنا لا يرى؟ الفار عندنا عنده مشكلة دا أمر يحتاج إلى وقفة حقيقة؛ العدالة في الرياضة أنا بتكلم عن العدالة في الكرة المصرية".
وأوضح: "الإسماعيلي يا جماعة أمام حرس الحدود وبعدين المقاولون تشوف حاجات وتقول هو في ايه؟ وبتكلم بشكل عام ايه مشكلة الفار في مصر؛ أيها الحكم المحترم اللي بتقعد في غرفة الفار ملكش علاقة باللاعب ليك علاقة باللي قدامك".
وأكمل: "أنت دورك تشوف الشاشة اللي قدامك؛ في كرات لا يمكن لو في أي دولة دخلت الفار عندها كور الناس تطرد وتتوقف والفار مش موجود مش هنا؛ الكور تبقى ضربة جزاء والفار مش موجود مش هنا".
وأوضح: "النهاردة الرياضة استثمار وفلوس وضخ وناس بتدفع مليارات؛ ليه كله بيتكلم النهاردة؟ عشان الناس كلها عنها شكوك عشان ميبقاش فريق داخل قلقان من الحكم؛ جبنا كلاتنبرج وقلنا هيعمل ولا عمل حاجة؛ بياخد فلوس وخلاص والله ما يستاهل ألف دولار على الفضائح اللي بتحصل في التحكيم المصري".
واختتم: "عمل ايه من يوم ما جه؟ باظت الكرة أكتر والأندية بتشتكي أكتر؛ مفيش فريق لم يشتكي؛ تخلص الماتشات وتلاقي الناس تجري على الحكم؛ الحكم يديلك 3 دقائق وممكن بعد دقيقة ونص تلاقيه صفر؛ أنت حكم أنت مالك مبن يفوز ومين يتغلب".
