مصطفى بكرى: "الطبقة المتوسطة تآكلت.. محتاجين خطة إنقاذ نستر بيها الناس"
طرح الإعلامي مصطفى بكري؛ عدد من المقترحات من أجل مواجهة الأزمة الاقتصادية الحالية ومساعدة المواطنين في التعامل مع الوضع الحالي.
وقال بكري خلال برنامج "حقائق وأسرار" المذاع على قناة "صدى البلد": "ازاي يا حكومة تقدري تقفي مع الشعب في الوقت ده وإزاي يا شعب تحط أيدك في أيد بلدك عشان الدنيا تمشي؛ أنا حاطط شوية اقتراحات أتمنى من كل مسؤول يسمعها".
وأضاف: "لازم أولا نعمل إغاثة عاجلة للفقراء والمهمشين ونعمل برامج حماية اجتماعية زيادة عن المبالغ اللي بتقدم ننقذ الناس ونقف معاهم قدام جنون الأسعار".
وتابع: "لازم نشوف حل نرفع العبء عن الطبقة المتوسطة هذه الطبقة التي اكتوت وتأكلت؛ هذه الطبقة التي دفعت الكثير؛ واحد بياخد 6 آلاف أو حتى 10 آلاف هيعمل بيها إيه؟ هيدفع الماية ولا الكهرباء ولا السكن؛ احنا محتاجين رد الاعتبار للطبقة المتوسطة نعمل خطة انقاذ نستر بيها الناس".
وتابع: "الدولة عليها مسؤوليات كبيرة أنا عايز نفكر سريعا في أن ننتهي من قانون البناء الموحد؛ قانون التصالح على مخالفات البناء المفروض الأيام الجاية يتعمل؛ الأهم والأخطر قانون البناء الموحد أحنا لينا 4 سنوات الناس متعطلة وقافلة عليها بيوتها طيب ليه؟ اقنعيني يا حكومة ليه قانون البناء الموحد لغاية دلوقتي مطلعش".
وواصل: "كل يوم بيعدي المقاولين والمرتبطين بمهنة البناء بيزداد تعبهم وفقرهم ومشاكلهم وأزماتهم وأنا ضربت أمثلة بالناس راحت دورت على شغلانة؛ 135 شغلانة مرتبطة بده طيب ياحكومة أنا أعذرك في حاجات ولكن دي أعذرك فيها ازاي".
وأكمل: "يا بتحترموا الرأي العام والإعلام يا اما دا مبيحصلش؛ دي خطوة تخفف عن الناس اللي قاعدة في بيوتها والبناء اللي توقف تماما".
وأوضح: "عاوزين ننهي التعقدات الإدارية اللي بتطفش أي حد؛ الواحد ينزل يحل مشكلة يطلع متعقد؛ كفاية الفساد الإداري اللي تحت دة لازم ناخد قرارات أحنا في حالة حرب؛ نوقف أي ضرايب جديدة أو أي رسوم جديدة لأن الناس معادش عندها ما يساعدها".
وذكر: "بنتمني نفرج عن مستلزمات الإنتاج الموجودة في الجمارك؛ اه في حاجات خرجت ولكن اليوم بسنة مينفعش عايزين ناخد إجراءات غير تقليدية؛ عايزين نشدد الرقابة ونفعل دول الأجهزة وينزلوا ونشوف ايه اللي بيحصل ويقدر يقف على حقيقة اللي بيجرا".
واختتم: "لازم ناخد موقف من تجار الأزمات ويبقي في إجراءات قوية وشعبية؛ لازم ياجماعة ندى أمل للناس؛ الشعب المصري بيعيش بالأمر وعايز دايما يحس أن صناع القرار معاه على الخط".
