محمد علي خير عن ترشيد الإنفاق: "الجنيه هيطلع بالقطارة من وزارة المالية"

عدد الإعلامي محمد علي خير؛ الخطوات التي قامت بها الحكومة من أجل ترشيد الانفاق وذلك ضمن جهودها لمواجهة الأزمة الاقتصادية الحالية.

وقال خير خلال برنامج "المصري أفندي" المذاع على قناة "المحور": "الحكومة قررت تشد خط وتعمل ترشيد إنفاق شديد؛ لأن مينفعش نطالب المواطن بترشيد الانفاق والحكومة متعملش ترشيد إنفاق؛ أول حاجة قالك أي مشروع جديد هتدخلوه وفيه مكون أجنبي هنشتريه بالدولار وقف يا عمنا".

وأضاف: "قالك مفيش ترخيص بالصرف على الأغراض المحظور الصرف عليها؛ الا في الأحوال اللي بيقدرها رئيس الوزراء؛ مفيش سفريات للخارج؛ وياحبذا لو المسؤول جاتله دعوة للخارج ووزير المالية يقدم تقرير كل شهرين بمدى التزام الجهات المخاطبة بده".

وتابع: "أنا عايز أقول للحكومة حاجة مهمة في قرارات الترشيد؛ كل اللي عملته الحكومة دا حلو والجنيه هيطلع بالقطارة من وزارة المالية ورئيس الوزراء ألزم وزير المالية يديله تقرير كل شهرين".

وأوضح: "من ضمن القرارات إيقاف الابتعاث إلى الخارج والبعثات التعليمية أناشد الدكتور مصطفى مدبولي استثناء البعثات إلى الخارج".

وواصل: "ما فعله رئيس الوزراء مهم ويبدأ يدينا أمل؛ زي مثلا ما أعلن وزير المالية مؤخرا وقال إن الموازنة الجديدة تتضمن الاستغناء عن عديد من المستشارين في دواووين الحكومة؛ لو جبت بند المرتبات بتاع المستشارين هتلاقي جوز بنت خالة منين وبنت عمة مين ودا مستشار ودا ودا؛ القرار دة ميطلعش ألا من رئيس وزراء؛ قال لدكتور معيط مش عايزين مستشارين إلا لما أمضي".

وأكمل: "القاعدة كل المستشارين يمشوا؛ تيجي الهيئة تقول أنا محتاج المستشار دة اكتبلي مذكرة ولازم يوافق عليه رئيس الوزراء؛ دا بيقولك أننا واصلين لمرحلة لازم الشدة الجامدة دي؛ ودا خبر من الأخبار اللي عجبتني وقلت ياريتها كانت من زمان".

واختتم: "وزير المالية قرر وأعلن أنه لا نية لفرض ضرائب جديدة؛ النقطة دي وأنت كمواطن ممكن تقول وأنا مالي ومال الكلام دة؛ لا دانت مالك ونص؛ أحد الطلبات بتاعة أي مستثمر يقولك لو سمحت ثبتلي الضرايب وأنا عايز أعرف الضرايب كام بالظبط عشان أعرف اشتغل وقال احنا بتجهز مشروع قانون لانهاء كافة الملفات القديمة وأن الحكومة لا ترغب في أن تدخل في نزاعات ضريبية مع مجتمع الأعمال".