مصطفى بكري: "الشعب معادش يستحمل والناس مش قادرة"

طالب الإعلامي مصطفى بكري؛ الحكومة بالاستماع إلى آراء المواطنين وإشراكهم في صنع القرار، مشيرا إلى أن الأزمة الاقتصادية أثرت كثيرا على محدودي الدخل.

وقال بكري خلال برنامج "حقائق وأسرار" المذاع على قناة "صدى البلد": "لازم نسمع بعض وكفاية كام واحد يحتكروا كل حاجة؛ الشعب معادش يستحمل والناس مش قادرة؛ لازم نحرص على بلدنا ويكون عندنا إدارة متفهمة وواعية ولا تحتكر القرار لنفسها".

وأضاف: "افتحوا الباب وخلوا الناس تتكلم وأدوا القطاع الخاص فرصته أنه يشتغل؛ عاوز عمالة ونمو وشغل لازم يكون عندك قطاع خاص وطني؛ الرئيس أتكلم أكتر من مرة على شركات قطاع الأعمال العام بدل ما أصفيها ما أعمل شراكة مع القطاع الخاص".

وتابع: "الصورة العامة لا يجب أن تصل بالناس إلى الإحباط؛ علينا أن نحترم عمال مصر جيدا وعلينا أن نحترم الفلاح وأن نحترم مشاكله وندي ميزات نسبية تساعد الناس دي أنها تقف على رجليها؛ صحيح أنه في إجراءات تمت للحماية الاجتماعية لكن لازم نخفف العبء عن الناس".

وواصل: "الطبقة المتوسطة تعبانة والناس تعبانة بجد وأي حد يقول كلام غير كدة يبقي كلام فاضي الشعب دا واعي وكبير وقادر ومحدش يستهين بيه؛ الشعب دة ذكي وفاهم وعنده موروث ثقافي وحضاري".

وأكمل: "الشعب دة عايز يبقي مشارك في الموضوع وناخد رأيه؛ زي ماقال الرئيس قبل كدة في الحوار المجتمعي؛ لازم يبقي في حوار مجتمعي حوالين كل قضية".

وأوضح: "أحنا مصر ومصر اللي فيها 105 مليون وعايزة تبني حضارة جديدة هل يعقل أن في ناس مش لاقية تاكل وأن الوضع الاقتصادي دة بالشكل دة".

وذكر: "علينا أن نشوف ازاي نوقف بلدنا على رجليها وعلينا أن نشوف ازاي نوقف بلدنا على رجليها وازاي نسيطر على الدولار؛ إذا كانت دي أزمة وهنعدي منها يبقي لازم ناخد الدروس والعظات والعبر؛ أحنا عايزين دولة تتقدم إلى الأمام وأنا ضربت مثل باللي بيحصل في رواندا؛ بلد كان كله قتل ودماء فجأة من ستة 2000 تغيرت الدنيا".

واختتم: "احنا 105 مليون فم مفتوح و2.5 مليون سنويا زيادة؛ احنا نحتاج إلى مواجهة حقيقة لمشاكلنا ودعم حقيقي للصناعة؛ احنا نحتاج إلى حرص على مصانع قطاع الأعمال العام واحنا في حاجة إلى تنمية القطاع الخاص وجذب الاستثمار".