عمرو أديب عن ارتفاع الدولار بالسوق السوداء: "هل حد جايبه غالي ورافض نزوله؟"

علق الإعلامي عمرو أديب على الارتفاع المستمر في سعر الدولار بالسوق الموازية على بالتوازي مع ارتفاع السعر الرسمي تدريجيا في البنوك.

وقال أديب خلال برنامج "الحكاية" المذاع على قناة "أم بي سي مصر": "شوفنا تخفيض ثلاث مرات للجنيه النهاردة على مدى اليوم قافلين على 27.60 وأنا كنت قلتلكم من يومين نحن نتجه إلى شيء يشبه التعويم؛ أنا بس اللي بستغربله حاجة أو حاجتين في ناس قاعدة في البلد أن كل ربع جنيه مسمع عندهم على طول".

وأضاف: "أزاي يا جماعة ما تستنوا جايز أخر النهار ينزل؛ الناس قاعدة ايديها على الأسعار وأنا من هنا ورايح لن أذكر أسعار وسلع".

وأضاف: "الحاجة التانية اللي مش فاهمها؛ المنطق هو ليه السوق السوداء تأبي النزول؟ ابتديت اشك؟ النهاردة احنا السوق السودة بتعلي مع السوق الرسمية هو في حاجة كدة؟ هو احنا هنجري ورا بعض؟ ما دي أشياء منعرفهاش".

وتابع: "السعر الرسمي بدأ يقرب فأنت بتطلع تاني؟ مين اللي قاعد هنا؟ اللي بيجرا ده في ناس بتلعب في السوق في حد جايبه غالي ورافض أنه ينزل؛ هنا ده مين عايزه؟ أشياء غريبة جدا؛ عايز أفكركم بحاجة بسيطة ودي بردو غريبة أنا بقولكم عجايب ومليش فيها تفسير".

وأوضح: "بقولكم هاتوا الخبرا في الحوار الوطني يشرحولنا؛ المنظمات الاقتصادية الدولية كانوا بيتكلموا عن السعر العادل للدولار وقالوا 22.5 وبعدين قالوا 23.5 وفجأة كلهم النهاردة كلهم غيروا الرقم؛ هو في ايه؟ طيب أهو دي بيوت خبرة عالمية".

وواصل: "النهاردة رسمي السعر بـ 27.60 أنا خايف على البلد لأن الفرق في العملة دة هيتجاب منين؟ واحنا أغلب الحاجات بنجبها من برة؛ لو طلع بكرة ربع جنيه بقينا في الـ 28 أنا موافق بس اللي فوق دة لسة موجود ليه؟ اتنين أنتوا لاقيين دولار ولا مش لاقيين؟".

وارتفع سعر الدولار الأمريكي اليوم في البنوك ليصل إلى 27 جنيها و60 قرشا في حين أنه يرتفع أيضا في السوق الموازية.