أحمد موسى ينتقد ضعف المعروض من السلع في معارض أهلا رمضان

انتقد الإعلامي أحمد موسى، ضعف المعروض من السلع في معارض أهلا رمضان التي تنظمها الحكومة من أجل بيع السلع للمواطنين بأسعار مخفضة.

وقال موسى خلال برنامج "على مسؤوليتي" المذاع على قناة "صدى البلد": "دايما لما نتكلم عن قضايا الناس مش معناه أن المسؤول ده كذا؛ لما بننزل الشارع بنلاقي الناس بتنزل عشان تقول رأيها وعندهم حق لما يكون عندهم رأي وأما يقولوا رسالة لازم تطلع؛ في وقت الازمات الكل بيعاني؛ المواطن النهاردة بيقول لما الدولة قررت تعمل معارض أهلا رمضان مبكرا وتقول إن إزازة الزيت بـ 25 جنيها تبقي بـ 25 جنيها".

وأضاف: "لما تقول الكميات متوافرة تبقي متوافرة؛ المواطن اللي تحرك اليوم من محافظة الشرقية إلى معارض أهلا رمضان في القليوبية صرف 50 جنيها عشان يوفر 300-400 جنيه ولما راح أتصدم فين الزيت ياجماعة خلص؛ في كميات تانية محددة تاخد سلعة أو اتنين".

وتابع: "نزلنا السوق الشعبي ورحنا معرض الحكومة معرض وزارة التموين عشان نعرف هنا ايه وهنا ايه؛ دايما يقولك هناك هتلاقي سعر 30% و25% خصم؛ هنا كام وهناك كام؛ اللي بقوله محدش يزعل عشان مصداقية أي حد يقول قدام المواطن عشان المواطن رايح يشتري".

وواصل: "لما يشوف سعر ويروح يلاقي غيره يبقي في مشكلة؛ ماجيش النهاردة أقول أه والله أحنا نزلنا كميات بس اتسحبت عشان في تجار خدوها؛ في مواطن عايز أزازة زيت ملوش علاقة بيه ليه علاقة أن أنا مصداقيتي كوزير تموين قولتلي في معرض فيه حاجتك موجودة وجيت ملقتش زيت"..

وواصل: "أنا بقول للمواطن صدقني تعالي عندي أنا مديلك سلع أرخص من برة؛ بديلك أزازة الزيت بـ25 جنيه وهي برة بـ50 جنيه؛ في تخفيض فعلا بس تبقى موجودة".

وأوضح: "في سلع موجودة أه؛ بس حاجات هو مش عايزها؛ هو المواطن عايز ايه؟ زيت؛ سكر؛ مكرونة؛ شاي؛ فول؛ دقيق دي أهم الحاجات اللي الناس عايزاها دلوقت؛ الناس قعدت تستني محدش جالهم ولو نزلت طن خلص يبقي عندك غيره في ناس راحت ملقتش".

واختتم: "لازم التدقيق والتشديد؛ مينفعش مواطن يروح ميلاقيش سلع، حق المواطن في ناس سافرت عشان تشتري سلع، هو ليه سافر عشان عنده ثقة أنه هيلاقي أرخص".