عمرو أديب: كلمة السيسي في الكاتدرائية عبرت عن استشعاره لما تمر به مصر
عبر الإعلامي عمرو أديب؛ عن سعادته بحديث الرئيس عبد الفتاح السيسي اليوم، خلال احتفال الأقباط بأعياد الميلاد، مشيرا إلى أن الدولة يجب أن تصارح المواطنين بما يحدث.
وقال أديب خلال برنامج "الحكاية" المذاع عل قناة "أم بي سي مصر": "الرئيس تحدث عن قلق المصريين؛ والجميع يعاني؛ الأغنياء والطبقة المتوسطة والفقيرة؛ يجب أن يشرح المسؤولين للناس إيه اللي بيحصل أنا سعيد ياريس أنك اتكلمت عن هذا الامر إحنا عايزين نعدي الموضوع بتاع يا جماعة الموضوع ده موجود في أي مكان في العالم".
وأضاف: "الحكومة عندها كل الأرقام ولكن مفيش بيانات ومعلومات والصورة الكاملة يجب أن تكون واضحة للشعب من أصغر واحد لأكبر واحد؛ دائما مع القرارات الاقتصادية والمالية زي المثال الأمريكي ما بيقول ستسوء قليلا قبل أن تتحسن كثيرا؛ طيب الانفراجة أمتي طيب شكلها عامل ازاي طيب نستنى إيه".
وتابع: "فكرة أن القيادة عارفة والناس مش عارفة هنفضل دايما معرضين للقصف أي حد يقصفنا أنما تيجي تقولي والله عملت كذا؛ كان في إجراءات اقتصادية اليومين اللي فاتوا حد قال للناس احنا بنعمل ايه؟ جميل أن الناس تثق في القيادة ولكن يجب".
وأوضح: "أنا عايز أقولك ياسيادة الرئيس؛ وقت الأزمات محدش بيثق في حد لازم حد يبني عنده الثقة؛ طمني ولكن بأشياء تطمئني اللي هو لا الوضع كذا وتقول للناس في حاجات تقدر تعملها وحاجات متقدرش".
وأكمل: "من تلات أيام أو أربع أيام الناس نزلت على وزير التموين ضرب جوة مجلس النواب وبرة؛ هيعمل ايه؟ الراجل واقف ملتزم سياسيا وعلى وجهة ابتسامة وميردش".
وواصل: "كان مفروض يقولهم ياجماعة دة اللي عندي أنا مقدرش ويقولوله الرقابة رقابة اية؟ الراجل عدد المفتشين اللي عنده مينفعوش شارع في الجيزة".
وذكر: "انتوا بتكلموا وزير التموين؟ ليه لأن المفروض الكلام يقول للناس يا جماعة والله ظروفنا كدة في الحتة دي؛ أي دولة في العالم بتواجه الناس".
واختتم: "الطوابير ليه رجعت تاني؟ أنا ممكن أقولك ليه وأقول اللي الراجل مش قادر يقوله؛ أديله فلوس وامكانيات وهو يعملك الرغيف فطيرة؛ كلم وزير المالية هو اللي بيقسم الفلوس؛ كلم وزير الزراعة زرعت قمح قد إيه؟".
